د امريکا استازو جرګې د بهرنيو اړيکو کمېټه د فبرورۍ په ۱۵مه په دوحې کې د امريکا او د اسلامي امارت ترمنځ د شوې هوکړې په اړه بحث کوي.
د بحث لپاره دې ناستې ته د افغانستان سولې لپاره د امريکا پخوانی ځانګړی استازی زلمی خليلزاد هم وربلل شوی دی.
د يادې کمېټې د مالوماتو له مخې، خلیلزاد به د دوحې هوکړې تطبيق او نه تطبيق په اړه يادې کمېټې ته مالومات ورکړي.
د امريکا د استازو جرکې د بهرنيو اړيکو کمېټې په دې اړه يوه بيان کې ويلي، د امریکا استازو جرګې د بهرنیو اړیکو کمېټې د دې غونډې موضوع ” د پردې شاته څرنګه د بایډن حکومت ونشوای کړای د دوحې توافق پلی کړي ” نومولې.
یادې جرګې زیاته کړې:« دا ناسته د پردې شاته د بايډن ادارې څنګه د دوحې هوکړه عملي نشوی کړای تر عنوان لاندې په دوحه کې د ملګرو ملتونو د سرمنشي انتونیو ګوټیرېش په کوربهتوب د افغانستان د وضعیت په اړه د بحث لپاره د دویمې مشورتي ناستې د جوړېدو په درشل کې جوړېږي.»
د دوحي هوکړهلیک له ۱۱ پړاوه خبرو وروسته، ۱۳۹۸ په کب میاشت کې د اسلامي امارت او د افغانستان سولې لپاره د امریکا ځانګړي استازي زلمي خلیلزاد ترمنځ د قطر په پلازمېنه دوحه کې لاسلیک شوه.
د سیاسي چارو کارپوهان وايي، دغه ناسته د دوحې هوکړهليک د مادو نه عملي کېدو په خاطر رابلل کېږي، ترڅو د يادې هوکړې اړوند هغه مادې چې نه دي عملي شوي، د اعمالولو لپاره اصولي لارې چارې په ګوته کړي.
امريکا په دوحې کې له اسلامي امارت سره هوکړې ته د رسېدو په موخه ۱۱ پړاوه مذاکرات وکړل او بلاخره د ۲۰۲۰ کال د فبرورۍ پر ۲۹مه يې د يادو مذاکراتو په پایله کې ترلاسه شوې هوکړه لاسليک کړه.
خو اوس پوښتنه دا ده، چې په دې ناسته کې به د دوحې هوکړې اړوند پر کومو مواردو بحث وشي او ايا دغه ناسته به د يادې هوکړې په تطبيق کې مؤثريت ولري؟
د نړیوالو اړیکو کارپوه واحد فقیري وايي:« په کانګرس کې چې دغه ناستې راغوښتل کېږي، د جمهوريت پالو له خوا وي. دوی ( جمهوریت پاله) په دې هڅه کې دي چې بایډن وځپي، بایډن کمزوری معرفي کړي او له دې موضوع ټاکنو کې بریا لپاره استفاده کوي.»
په دې هوکړه کې له وسلهوالو ډلو سره د اسلامي امارت د اړیکو د پرې کېدو ترڅنګ په افغانستان کې د یوه ټولګډونه حکومت د جوړیدو او په دغه هېواد کې بشري حقونو ته د درناوي مسایلو ته هم ځای ورکړل شوی دی.
د امریکا مخکېني ولسمشر ډونالډ ټرمپ له فاکس نیوز سره په يوه مرکه کې له افغانستانه د امریکایي ځواکونو وتل د دغه هېواد د تاریخ تر ټولو شرموونکې پېښه بللې.
