د امریکا استازو جرګې بهرنیو اړیکو کمیټه له افغانستانه د امریکايي ځواکونو په بېړه وتل او د تخليې پرمهال د کابل پر هوایي ډګر د ځانمرګي برید په پېښه کې د ۱۳ امریکايي سرتېرو د وژل کېدو قضیې د څېړلو لپاره، د ولسمشر جوبایډن ادارې ۹ چارواکي د کتبي مصاحبې له لارې استجوابوي.
د امریکايي رسنیو د راپورنو له مخې، په دې کسانو کې د افغانستان د سولې لپاره د امریکا ځانګړی پخوانی استازی زلمی خلیلزاد، د بهرنیو چارو وزیر انټوني بلېنکن، د افغانستان لپاره د امریکا مخکينی سفیر جان بس او شپږ نور چارواکي شامل دي.
له دې کسانو غوښتل شوي، چې د روانې سپتمبر میاشتې تر اوومې پورې د دې موضوع په تړاو د جرګې د غړو پوښتنو ته ځواب ووایي.
د امریکا د استازو جرګې د بهرنیو اړیکو د کمېټې مشر مایکل مککال وايي:« د جوبایډن ادارې دغه کسان له افغانستانه د امریکايي سرتېرو له شرمه ډکې وتنې په تړاو له ځان سره اړین مالومات لري. هغه بېړنۍ وتنه چې په پایله کې طالبانو ته له شرمه پر ډکې تسلیمۍ او د امریکا د ۱۳ سرتېرو پر وژنې او د ۴۵ نورو هغو پر ټپي کېدا منتج شوه، دا هغه څه وو چې مخنیوی شوني وه. دا یو لوی او نه ختمېدونکی ناورین دی.»
د مایکل مک کال پر مشرۍ د بهرنیو اړیکو کمېټې دغه پرېکړه د تېرې سې شنبې په ورځ د کابل هوايي ډګر د پېښې له قربانیانو سره تر لیدنې او سلامشورو وروسته کړې.
په دې پېښه کې د وژل شویو امریکايي سرتېرو کورنۍ د امریکا حکومت له افغانستانه د ځواکونو د وتنې پر ناسم مدیریت او له پېښې وروسته د خپلو تېروتنو پر پټولو او عادي ښودلو تورن کړی.
مککال دې کورنیو ته د پېښې د پوره څېړلو ډاډ ورکړی.
هغه زیاتوي:« زه تاسو سره ژمنه کوم چې د دې پېښې د څېړلو لپاره به د خپلې وینې تر وروستي څاڅکې وجنګېږم او د حقیقت تر موندنې پورې به په دې لار کې خپله هېڅ راز هڅه دریغ نه کړم.»
د سیاسي چارو شنونکو په باور له افغانستانه د امریکايي سرتېرو د وتلو څرنګوالی او اړوند مسلې د جمهوريپالو او ډېموکراټانو ترمنځ د سیاسي مخالفت برخه ده، چې افغانانو ته يې هېڅ ګټه نشته ده.
دوی وایي، امریکا په تېرو ۲۰ کلونو کې هېڅ داسې بنسټیز کارونه نه دي کړي، چې افغانستان ته یې ګټه ورسي او له مله يې راتګ او لانجمنې وتنې عام امریکایان او سیاسیون له ابهام سره مخ کړي.
د سیاسي چارو شنونکی شېرحسن حسن وايي: « دا د امریکایانو خپلې داخلي ناندرۍ دي او د افغانستان خلکو ته یې هېڅ ګټه نه رسېږي. امریکایانو که د ټولنیز عدالت تامین غوښتلی حد اقل له مشرتابه څخه به یې پوښتنه کړې وه، چې تاسې ۲۰ کاله په افغانستان کې ووسېدئ، نه یوازې تاسې بلکې ستاسې پر مشرۍ ټوله ناټو هلته وجنګېدله، په افغانستان کې مو په لسګونو زره یا سلګونه زره خلک مړه او بې کوره کړل.»
د سیاسي چارو شنونکی حمیدالله هوتک وايي: « دا د دوی خپل کار دی، د افغانستان د درد لپاره دوا نه شي جوړېدی. د امریکا پالېسي یو خاص څوک جوړوي او حکومتونه یې هغه پالېسي تعقیبوي؛ نو دا د وخت د حکومتونو د پالېسۍ هغه کړنه وه چې وشوله.»
یو شمېر نور بیا د امریکايي چارواکو دغه کړنې د خپل ولس د تېراېستنې هڅه ګڼي، چې په خبره یې په دې توګه غواړي په یو ډول پر خپلو تېروتنو پرده واچوي او له مسووليت ځان خلاص کړي.
د سیاسي چارو شنونکی عبدالجبار اکبري وايي: « په دې ورځو کې د امریکا مخکیني چارواکي له افغانستانه د امریکا نامسوولانه وتنې په اړه سپيناوی غواړي، زما په نظر د دې کار لپاره ډېر ناوخته دی چې څېړنه وکړي.»
له افغانستانه د امریکايي سرتېرو د وتنې په تړاو د استازو جرګې بهرنیو اړیکو کمېټې څېړل داسې مهال دي، چې له دې وړاندې هم د دې کمېټې مشر مایکل مککال هم د يادې موضوع د څېړنې غوښتنه کړې وه.
