په مسکو کې د افغان سولې په تړاو دوه ورځینۍ ناسته پای ته ورسېده.
مسکو دوه ورځې د حکومت د وسلوالو او سیاسي مخالیفینو د ناستې کوربه و هغه ناسته چې طالبانو او د افغان حکومت منتقدینو په کې مخامخ سرخلاصې خبرې وکړې اوګډون والو یې په دوام ټینګار درلود.
دا د ۱۷ کلنې جګړې د پای پرسر ډیالوک و چې د جګړې له اړخه طالبان و، خو د افغان حکومت استازی پکې نه و.
دا ښایي په افغانستان کې د امریکا د اوږدې جګړې د پای یو څرک وي، خو اساسي ستونزه پرځای پاتې چې طالبان د افغان حکومت سره خبرې نه کوي او د حکومت مرکچي پلاوی ډېرو ته د منلو نه دی.
په غونډه کې ډېر داسې مشترکات ولیدل شول چې طالبان او سیاسیون په کې ستونزه نه لري.
د مسکو د غونډې ګډونوالو د سولې لپاره د ورته غونډو په دوام ټینګار کړی او باور لري چې دا ناسته به د سولې خبرو ته ور پرانیزي.
طالبانو او سیاسیونو په دوه ورځینو خبرو کې د ستونزې حل سیاسي مذاکرات بللي دي.
د طالبانو مرکچي پلاوي د خپلو هغو خبرو سپیناوی ورکړ چې ویلي وو، امنیتي ځواکونه به منحل شي.
طالبان په مسکو کې د افغان حکومت له سیاسي مخالفینو سره د ناستې راضي ښکاري خو په قطر کې د اسلامي امارت د دفتر مشر خپلې هغه خبرې بېرته اخیستي چې ویلي وو له سولې وروسته به اردو منحل کېږي.
د مسکو له ناستې دا پایله ډېره محسوس کېږي چې طالبان به د افغان حکومت سره هم خبرو ته تیار شي.
د مسکو د ناستې له جوړېډو روسې انکار کړی او دا غونډه یې د په روسیه کې د میشت افغانانو نوښت بللی دی.
