د افغان جګړې او سولې په تړاو امریکا غوڅه پریکړه نه شي کولی.
امریکا که له یوې خوا له طالبانو سره د سولې خبرې بریا ته نیږدې کړي تر څنګ یې اوس د واشنکټن پالیسي په مبهم حالت کې واقع ده.
هلته سیاسیون او نظامیان له بیلابیلو سټیجونو متفاوتې نظریې وړاندې کوي چې په ښکاره د دوی تر منځ د نظر اختلاف ښکاروندوی کوي.
د ټرمپ له توندو څرګندونو وروسته پخواني او اوسني نظامیان د افغانستان په تړاو څرکندونې کړي چې د امریکا په ضعیف او دوه مخي باندې دلالت کوي.
د امریکایي ځواکونو لوی درستیز افغانستان کې د ۱۸ کلنې جګړې ختمېدو ته محتاطانه خوشبینې ښودلې.
د سي آی اې پخواني مرستیال مایکل مورل ویلي، له طالبانو سره د امریکا اوسنۍ خبرې د دې لپاره نه دي چې جګړه ختمه شي، بلکې په وینا یې امریکا غواړي له افغانستان ابرومندانه ووځي.
د حرکت انقلاب اسلامي ګوند مشر مولوي قلم الدین داسې وايي (( امریکا هیڅکله په دنیا کې داسې سوله نه ده کړې چې د دوی په ګټه نه وي، کله چې د دوی ګټې وي کوي او که ګټې یې نه وي نه یې کوي، لکه د کوریا رییس جمهور سره یې چې خبرې وشوې چې کله پوه شول چې په ګټه یې نه دي خوشې یې کړلې.))
د سولې د خبرو په لړ کې امریکا کله د خپلو پوځیانو د وتو او کله د استخبارتي حضور د پراخېدو خبره کوي.
د ولسمشر ویاند صدیق صدیقي داسې وویل (( د امریکا د بهرنیو چارو وزیر اظهارات دا دي، چې په افغانستان کې به د بهرنیو ځواکونو پاتې کېده د شرایطو په اساس طعین کېږي.))
د افغان سولې لپاره اوس په سیمه او د قدرت مندو هېوادونو تر منځ په ظاهر کې نظر یو دی، خو باور دا دی چې لاهم یو شمېر هېوادونه شته چې دغه پروسه په لوی لاس تخریبوي.
