په چین کې د افغان سولې لپآره جوړېدونکې ناسته ځنډول شوې.
د افغان سولې په اړه د چین جوړېدونکې ناسته چې تمه کېده دوه ورځې وروسته په بېجینګ کې جوړه شي د اوس لپاره ځنډول شوې ده.
یوې باوري سرچینې شمشاد ته ویلي، چین غوښتل غونډه کې د بېلا بېلو ادرسونو خلک وروغواړي خو افغان حکومت یې مخالفت کړی دی.
سرچینې دغه راز ویلي، افغان حکومت په دې ټینګار درلود چې د چین په ناسته کې باید ګډونوال د افغان حکومت په استازولۍ برخه واخلي.
خو د حکومت منتقدین بیا په دې باور دي چې د حکومت په اډانه کې جنجالونه او په یو لیست نه سلا کېدل هغه عوامل دي چې ناسته یې ځنډولې ده.
دا ناسته به د خپلمنځیو خبرو یو پیل وي چې د خبرو په میز طالبان، حکومت او سیاسیون راټولیږي.
خو د اوس لپاره د غونډې د ځنډېدو ملموس عوامل د نوملړ پرسر جنجال دی چې باور کېږي حکومت نه خوښوي دا ناسته ډېره غټه اوسي.
ولسمشر غني په همدې تړاو له مخکیني ولسمشر حامد کرزي هم غوښتي چې چین ته لاړ نه شي.
حامد کرزي داسې وویل (( دلیل همدا و، دوی فکر کوي چې په چین کې به د ملي روغې جوړې لپاره په یو نظام کار کېږي، او ما ونه غوښتل په هغه ناسته کې ګدون وکړم، چې ولسمشر غني ترې تشویش لري. ما هم ورسره ومنله، زما تګ هلته ضروري نه و او له لیست مې خپل نوم وایسته. خو وروسته مې ولیدل چې په ځینو نورو مشرانو او سیاسیونو هم دا خبره منل کېده چې د چین ناسته کې ګډون ونه کړي خو ما ورسره مخالفت وښود.))
یوې باوري سرچینې بیا شمشاد ته ویلي، چین غوښتل په دې ناسته کې له څو اړخونو او چینلونو خلک را وغواړي چې افغان حکومت یې مخالفت کړی او ټینګار په یو پلاوي وو،چې باید د حکومت د چتر لاندې وي.
د چین په میز طالبان، سیاسیون او حکومت په لومړي ځل خبرو ته کېني چې په تېرو څو کلونو کې ورته هڅه کېده.
د چین ناسته د نړیوالو فشارونو سره هم مخ کېدونکې ښکاري.
امریکا چې طالبانو سره د سولې بیا خبرو ته داخلیږي انګېرنې دادي چې دغه هېواد نه غواړي د مسکو په څېر چین هم د سولې په خبرو اترو کې دوی ته شرایط او لاره سخته کړي.
چین او روسیه امریکا ته په بهرني سیاست کې رقیب هېوادونه تعریف شوي دي او امریکا به ونه غواړي دا هېوادونه په افغانستان کې زیات مصروف پاتې شي.
د ولسي جرګې غړي محمد عظیم کبرزاني او سیاسي شنونکي شعور نیازي داسې وویل (( یو لامل یې دا کیدای شي چې ممکن امریکا ونه غواړي چې چین د سولې پروسه کې دخیل شي،،،، تر اوسه حکومت نه دی توانېدلی چې یو واحد ټیم د غونډې لپاره جوړ او معرفي کړي، موږ د سولې غوښتونکي یوو، او سوله زموږ لپاره لومړیتوب لري.))
اوس به ولیدل شي چې د چین ناسته به د افغان سولې په برخه کې څه ډول رول ولوبوي خو د جګړې په اړخونو ټینګار دا دی چې په خپل پراخ ګډون سره ناسته کې برخه واخلي چې د سولې په برخه کې یو باور رامنځ ته شي.
