د قطر او ترکیې په منځګړیتوب د افغانستان او پاکستان پلاوو چې د وروستیو شخړو او ستونزو د حل او هواري په موخه وړمه ورځ دوحې ته تللي وو، په مخامخ مذاکراتو کې پر مهمو مسایلو هوکړې کړې.
په دې مذاکراتو کې چې په کې د دواړو خواوو دفاع وزیرانو او د استخباراتي ادارو رییسانو ګډون درلود، پر بشپړ او ماناداره اوربند هوکړه شوې او په راتلونکي کې د خبرو له لارې د ستونزو پر حل توافق شوی.
په هوکړه کې دواړو خواوو دې ته ژمنتیا ښودلې، چې د یو بل پر امنیتي ځواکونو، عامو خلکو او تاسیساتو بریدونه نه کوي او د یوه میکانېزم له لارې به ادعاوې څېړل کېږي.
د اسلامي مرستیال ویاند حمد الله فطرت وايي:« د دوه اړخیزې توافقنامې له مخې، دواړو خواوو سولې، یو بل ته احترام او د ګاونډیتوب ښو اړیکو ته پر ژمنتیا ټينګار کړی، دواړه لوري د ډیالوګ له لارې د ستونزو او مسایلو د حل غوښتونکي دي، دواړو اړخونو په بشپړ او مانا داره اوربند توافق وکړ، پرېکړه وشوه، دواړه هېوادونه باید د یو بل پر وړاندې د عاداوت هېڅ عمل نه ترسره کوي.»
پرېکړه شوې چې دواړه خواوې به د یو بل پر وړاندې پاروونکي اعمال نه کوي او د توافقنامې له مخې به سولې، درناوي او ښو اړیکو ته ژمنتیا ښيي.
د پاکستان دفاع او بهرنیو چارو وزیرانو هم له یادې توافقنامې هرکلی کړی او دغه څه یې د سم جهت پر لور لومړی ګام بللی.
د پاکستان بهرنیو چارو وزیر اسحاق ډار د دې مذاکراتو په تسلسل د ترکیې په کوربتوب د بلې هغې ناستې خبر هم ورکړی چې په کې به هغه توافقات وڅېړل شي چې په دې تازه هوکړه کې پرې موافقه شوې.
د پاکستان دفاع وزیر خواجه محمد اصف وايي:« د پاکستان او افغانستان ترمنځ د اوربند هوکړه وشوه. د پاکستان په خاوره کې د ترهګرۍ لړۍ باید ژر تر ژره بنده شي. دواړه ګاونډي هېوادونه به د یو بل درناوی ساتي.»
په دې مذاکراتو کې که څه هم پر مهمو موضوعاتو توافق شوی، خو دا نه دي ویل شوي چې د هوکړې د نقض په صورت کې به وروستي ګامونه څه وي؟
بل پلو د سیاسي چارو شنونکي تېر ته په کتو د پاکستان له لوري په هوکړه کې د درج شویو مواردو پر عملي کېدا شک ښيي.
د دوی په نظر د کابل او اسلام اباد ترمنځ مسایل هغه مهال په اساسي توګه حل کېدا شي چې د پاکستان پوځي رژیم له خپلو بېځایه غوښتنو او توقعاتو لاس واخلي.
د سیاسي چارو شنونکی واحد فقیري وايي:« کېدی شي چې اوسنی تشنج تر یوه حده پورې راکم کړي، دا تشدد چې رامنځته شو، دا هم راکم کړي، خو د دې مسالې دایمي حل نه دی، دایمي حل هغه وخت کېدی شي چې پاکستان له دغو تورونو لاس واخلي، خپلو ستونزو ته پام وکړي.»
دا داسې مهال ده چې د پاکستان پوځي رژیم په پرلپسې ډول د افغانستان هوايي حریم نقض او په پلازمېنه کابل، پکتیکا او کندهار کې یې پر عامو افغانانو ړندې بمبارۍ وکړې چې په پایله کې یې لسګونه کسانو ته مرګژوبله واوښته.
اسلامي امارت هم د کندهار په سپین بولدک او د ډیورند فرضي کرښې هاغاړه یې د پاکستان پوځي رژیم پر پوستو انتقامي بریدونو کې ګڼو ځواکونونه درنه مرګژوبله واړوله.
