په کابل کې د ترکیې سفیر جیهاد ارګینای وویل، له افغانستان سره يې د ډيپلوماتیکو اړیکو يوه پېړۍ شوې او ټینګار یې وکړ،چې د ښو اړیکو او همکاریو دا لړۍ غځول غواړي،تر څو له افغانانو سره په اقتصادي، ښوونيز او نورو برخو کې خپلې همکارۍ پراخې کړي.
ارګینای وايي:« ترکیه له افغانستان سره تاريخي اړيکې لري،چې دا ورځ يې يوه نښه او سمبول دی. د دواړوهېوادونو د دوستۍ د ۱۰۱ يویمې کليزې په مناسبت چې هر کال کوم فعالیتونه تر سره کوو،نن هم دلته راغلو،چې دې ځنګل کې بوټي کېنوو. تر څو د افغانستان په بيارغونه کې برخه واخلو.»
د ترکیې سفیر ژمنه وکړه،چې د هغو پراختیايي پروژو په تطبيق کې به مرسته او همکاري وکړي،چې له وروستي تحول وروسته یې چارې درېدلې دي.
هغه زیاته کړه:« له کابل ښاروالۍ سره به زموږ اړيکې دوام ولري. موږ په پام کې لرو،چې له دوی سره کينو او په هغو انکشافي پروژو خبرې وکړو،چې تطبيق شوي نه دي او کارونه يې نیمګړي پاتې دي.»
د کابل ښاروال عبدالرشید بلوچ بیا د ښاروالۍ ځينو برخو کې د یو لړ ستونزو یادونه وکړه او ډاډ یې وښود، چې انقره ژمنه ده،چې د کابل له ښاروالۍ سره د شته ستونزو په حل کې همکاري او مرسته وکړي.
بلوچ زیاتوي:« موږ له سفير سره خبره وکړه. دوی په هر بخش کې د همکارۍ خبره وکړه. دوی وویل حاضر دی،چې په هره برخه کې همکاري وکړي.»
د افغانستان او ترکيې د ۱۰۱ یمې کلیزې مراسمو کې د ترکیې سفیر وویل،افغانستان ته یې په تیرو څو میاشتوکې ۱۷۵۰ ټنه خوراکي او غیر خوراکي توکو بشري مرسته رارسولې او له دې وروسته هم هڅه کوي،ترڅو اړمنو افغانانو سره مرستې وکړي.
