واک ته د اسلامي امارت له بیاځلې رسېدو وروسته که څه هم د افغانستان او تاجیکستان ترمنځ اړیکې په خپل عادي حالت کې نه وې، خو د راپورونو پراساس دغه اړیکې اوس د نږدې کېدو په حال کې دي.
یوراسیانټ رسنۍ راپور ورکړی چې د تاجیکستان ولسمشر امامعلي رحمان پر مشرۍ د تاجیکستان اوسنی حکومت په دې لټه کې دی چې له سرپرست حکومت سره اړیکې ښې کړي،خو په وینا یې دواړه خواوې محتاطانه کار کوي.
راپور کې ویل شوې، د دواړو خواوو ترمنځ اړیکې دا مهال د تودېدو په حال کې د سرپرست حکومت مو جوده پالیسي او افغانستان ته د تاجیکستاني پلاوي وروستي سفرونه د اړیکو د نږدې کېدو لاملونه بللي.
د راپور یوه برخه:« د افغانستان او تاجیکستان چارواکو د مخالف نظرونو شتون د احتیاطي او کله نا کله د متضادو دریځونو ښکارندوی کوي. د دې ترڅنګ یې د دواړو هېوادونو ترمنځ د اړیکو تودوالی دامهال له ورایه لیدل کیږي. هغه هېوادونه چې ترمنځ ۱۳۷۴ کېلو متره ګډه پوله لري.»
راپور کې د سرپرست حکومت پر وړاندې د تاجیکستان حکومت چارواکو په پاروونکو څرګندونو کې بدلون، د اړیکو د پياوړتیا یو بل لوی لامل یاد شوی.
تاجکستان د نورو هغو په څېر هغه هېواد دی چې نه یوازې دا چې اوسنی حکومت یې پر رسمیت نه دی پېژندلی، بلکې په تېرو نږدې څلور کلونو کې یې دفاعي دریځ لرلی.
د سیاسي چارو شنونکی عزیز معارج وايي:« ګاونډي هېوادونه هم مجبور دي چې له افغانستان سره اړیکې ولري ځکه اړتیا لري، هم د ترانزیټ له لحاظه، هم له ټولنیز ژوند لحاظه، هم له اقتصادي او هم له سیاسي او امنیتي لحاظه دوی غواړي ډاډمن واوسي. افغانستان هم اړتیا لري، همدا وجوهات دي چې باید اړیکې جوړې شي. نو که اړیکې صادقانه وي، د خپلواکو هېوادونو په توګه وي، د دواړو هېوادونو ملي ګټې په پام کې نیول شوې وي، د نه لاسوهنې اصل باید مراعت کړي، نو په هغه وخت کې کېدی شي چې اړیکې د دواړو هېوادونو پر ګټه دي.»
له دې وړاندې د ریاست الوزار پخواني سیاسي مرستیال مولوي عبدالکبیر هم ویلي و چې د افغانستان او تاجیکستان ترمنځ سیاسي اړیکې د نږدې کېدو په حال کې دي او په راتلونکې کې یې د دواړو خواوو ترمنځ د رسمي لیدونو د ډېرېدو خبر هم ورکړی و.
بل پلو بیا د سیاسي چارو شنونکي د دواړو خواوو په اړیکو کې مثبت بدلون مهم ګڼي او زیاتوي چې تاجکستان درک کړې چې د افغانستان پر وړاندې مخالف دریځ یې پرګټه نه دی.
