د بهرنیو چارو وزارت مالي او اداري معین په افغانستان کې د آذربایجان له شارژدافیر الهام محمدوف سره په لیدنه کې د سیاسي، اقتصادي او فرهنګي همکاریو پر پراختیا خبرې کړې.
په دې دوه اړخیزه لیدنه کې د دواړو خواوو ترمنځ اړیکې مهمې بلل شوې او د دې اړیکو د لاپیاوړتیا هیله یې څرګنده کړې.
د آذربایجان شارژدافير په دې لیدنه کې ویلي، هېواد یې له افغانستان سره خپلو اړیکو ته ځانګړی اهمیت ورکوي او له همدې کبله یې افغانستان کې خپل سفارت پرانیستی او افغان ډېپلوماټان یې هم منلي دي.
د بهرنیو چار وزارت د وياند مرستيال ضیاء احمد تکل وايي: « په دې کتنه کې د افغانستان او آذربایجان ترمنځ د دوه اړخیزو سیاسي، اقتصادي او فرهنګي همکاریو پر پراختیا خبرې وشوې. د بهرنیو چارو وزارت مالي او اداري معین د “کوپ ۲۹” غونډه کې د افغان پلاوي د ګډون او د آذربایجان له همکاریو د مننې ترڅنګ؛ د دواړو هیوادونو ترمنځ اړیکې مهمې وبللې او د دې اړیکو د لاپیاوړتیا هیله یې څرګنده کړه.»
افغان لوري د آذربایجان په پلازمېنه باکو کې د تېر ۲۰۲۴ زیږدیز کال په نوامبر کې د اقلیم بدلون یا کاپ۲۹ سرمشریزې ته د افغانستان د چاپېریال ساتنې ملي ادارې استازي له وربللو هم مننه کړې.
آذربایجان په لومړي ځل د تېر لمریز کال په وري میاشت کې په افغانستان کې خپل سفارت پرانیست چې وروسته بیا افغانستان هم دغه هېواد ته د سفیر په کچه خپل ډېپلوماټان واستول.
د سیاسي چارو شنوونکی محمد سلیم پیګیر وايي: « آزربایجان هغه هېواد دی چې اکثریت وګړي یې مسلمانان دي. موږ کولی شو د هغوی له لارې له نورو اسلامي هېوادونو او په ځانګړې توګه ترکیې سره ښې او غوره اړیکې جوړې کړو.»
د سیاسي چارو شنونکی جنت فهیم چکري وايي: « که موږ وکولی شو چې له دې هم زیات د آزربایجان هېواد اعتماد خپل کړو، دغه هېواد کولی شي د افغانستان لپاره یو ښه لابیګر جوړ شي.»
ځینې نور بیا د آذربایجان په ګډون د سیمې او نړۍ له هېوادونو سره د هراړخیزو اړیکو ټینګښت او پراختیا په اوسنیو شرایطو کې د سرپرست حکومت له مهمو اړتیاوو بولي.
د سیاسي چارو شنونکی مرتضی مطهري وايي: « د اسلامي امارت او نړۍ ترمنځ د اړیکو پراختیا د افغانستان د خلکو پر اوسني وضعیت ډېر مثبت اغېز لري. دا په هغه صورت کې چې دغه اړیکې ډېپلوماټیکې وي او د دواړو طرفونو ګټې په پام کې ونیول شي، نه دا چې د سیمې هېوادونه یا د افغانستان ګاونډي هېوادونه د اسلامي امارت له حکومت سره د اړیکو په بدل کې د امتیاز غوښتنه وکړي.»
دا په داسې حال کې ده چې واک ته د اسلامي امارت له بیا ځلې رسېدو سره که څه هم پر نړیواله کچه اړیکې عادي حالت ته نه دي راغلي؛ خو له دې سره د سرپرست حکومت د چارواکو په خبره افغانستان دا مهال له شاوخوا ۴۰ هېوادونو سره مستقیمې عادي اړیکې لري چې آذربایجان یو له هغو دی.
