د پاکستان د لومړي وزیر مرستیال او په ورته وخت کې د دې هېواد د بهرنیو چارو وزیر محمد اسحاق ډار د کابل له سفر وروسته د اسلامي امارت د بهرنیو چارو وزارت له سرپرست مولوي امیرخان متقي سره ټیلیفوني خبرې کړې.
د بهرنیو چارو وزارت مرستیال ویاند ضیا احمد تکل وایي، په دې ټیلیفوني خبرو کې دواړو لورو کابل ته د پاکستاني پلاوي د سفر په جریان کې د شویو بحثونو له پایلو خوښي ښودلې او هوکړه یې کړې چې کړې ژمنې دې ژر او په اغېزناکه توګه د دواړو هېوادونو د خلکو د متقابلو ګټو لپاره عملي شي.
تکل زیاتوي: « په دې ټیلیفوني مکالمه کې ښاغلي محمد اسحاق ډار ټينګار وکړ چې کابل کې د شویو ژمنو د پلي کېدو لپاره به هڅې کوي او په ځانګړي ډول د مهاجرینو د ستونزو په حل کولو او شکایتونو د اوریدلو لپاره به جدي اقدامات ترسره کوي.»
بل لور ته د بهرنيو چارو وزارت سرپرست مولوي امیرخان متقي هېواد ته د راستنېدونکو افغان کډوالو ستونزو ته د رسېدو په موخه په پاکستان کې په مرکزي کچه د کنټرول خونې او د مرستې ترلاسه کولو لپاره د اړيکو شمېرو د فعالولو اقدامات ستايلي دي.
په ورته وخت کې محمد اسحاق ډار مولوي امیرخان متقي ته بلنه ورکړې چې پاکستان ته سفر وکړي.
احمد تکل په دې اړه وايي: « محترم متقي صاحب کابل ته د خپل پاکستاني سيال سفر د ستونزو د حل په لور یو مثبت ګام وباله او د شویو پرېکړو د پلي کولو، په ځانګړي توګه هېواد ته د راستنېدونکو افغان مهاجرينو ستونزو ته د رسېدو په موخه په مرکزي کچه د کنټرول خونې او د مرستې د اړيکو شمېرو د فعالولو اقدامات وستایل.»
د افغانستان لپاره د پاکستان ځانګړي استازي محمد صادق خان هم خبر ورکړی چې پاکستان د افغان کډوالو ستونزو او شکایتونو ته د رسېدو لپاره ځانګړی مرکز پرانیستی دی.
هغه زیاته کړې: « دا مرکز به په اوونۍ کې ۲۴ ساعته پرانیستی وي، ترڅو د افغان کډوالو د اخراج په لړ کې د پاکستاني پولیسو د ناوړه چلن او ځورونو په اړه شکایتونه په کې ثبت شي.»
د دواړو هېوادونو بهرنیو چارو وزارتونو د کډوالو، سوداګریزې راکړه ورکړې او د اړیکو ښه کولو ور هاخوا دا نه دي په ډاګه کړي چې نور يې په کومو برخو کې ژمنې کړې دي، خو د سیاسي چارو شنونکي وایي، که دواړه هېوادونه کړې ژمنې عملي کړي، د دواړو هېوادونو اړیکې به هم ورسره ښې شي.
د سیاسي چارو شنونکی شهزاده مسعود وايي: « هغه ژمنې چې دوی په کابل کې د افغانستان له چارواکو سره د لیدنو پرمهال وکړې، باید عمل پرې وکړي. په ورته وخت کې، موږ د تېرو درېیو لسیزو راهیسې له ټولو ګاونډیانو سره د ښو اړیکو غوښتونکي یو او په ځانګړې توګه پاکستان سره.»
د سیاسي چارو شنونکی ادریس محمدي ځاځی وايي:« په ژمنو د عمل لپاره باید نړیوال تعهدونه واخیستل شي، ترڅو پاکستان په تجارت، ټرانزیټ او سیاسي برخو کې کړو ژمنو ته متعهد پاتې شي.»
بل پلو، د ایران بهرنیو چارو وزارت هم په یوه اعلاميه کې ویلي چې د پاکستان بهرنیو چارو وزیر او د دې هېواد د لومړي وزیر مرستیال محمد اسحاق ډار او د ایران بهرنیو چارو وزیر سیدعباس عراقچي د یکشنبې په ماښام د ټیلیفوني خبرو په لړ کې د دوه اړخیزو اړیکو، په افغانستان، سیمې او نړۍ کې د بدلونونو په اړه خبرې کړې دي.
