د قطر بهرنیو چارو وزارت وايي، د اسلامي همکاریو سازمان د غړيو هېوادونو د بهرنيو چارو وزيرانو تماس ډلې په سعودي عربستان کې د افغانستان په اړه تخنیکي غونډه کړې.
په یاده غونډه کې د قطر په استازیتوب د یاد هېواد بهرنیو چارو وزارت لوړپوړي چارواکي هم ګډون کړی و او د افغانستان وضعیت په اړه یې د ګډ او متوازن چلن اړتیا مطرح کړې.
دې قطري چارواکي د اسلامي همکاریو سازمان د قوانینو په چوکاټ کې د افغانستان لپاره بېړنۍ بشري مرستې، مسوولانه سیاسي تعامل او د افغانانو د غوښتنو پر ملاتړ هم ټینګار کړی.
د قطر بهرنیو چارو وزارت د ځانګړي استازی د دفتر لومړی منشی خالد عبدالعزیز الخلیفي وايي:« قطر باور لري چې دا غونډه یو مهم فرصت برابروي څو تخنیکي ارزونې شریکې شي، هڅې همغږې شي او عملي سپارښتنې جوړې شي چې د وزیرانو د تماس ډلې اغېزناک او یو موټي عمل وړتیا پیاوړې کړي. همدارنګه باید ووایم چې د ملګرو ملتونو پر مشرۍ د دوحې بهیر کوربهتوب د قطر د دې ټینګې عقیدې له مخې دی، چې رغنده خبرې اترې د سولې تر ټولو اغېزناکه لار ده.»
د اسلامي امارت مرستیال ویاند حمدالله فطرت وايي:« موږ دغه شان ناستو کې د افغانستان حضور غوښتونکي یو، څو له خپل دریځ استازولي وکولای شي او د افغانستان وضعیت ښه تشریح کړي او له دې لارې د افغانستان په اړه نیول کېدونکې پرېکړې موثر او اغیزناک تمام شي. د خپل دوست او ورور هېواد قطر له دریځ نیولو مننه کوو چې واقعا یې په افغانستان کې کلیدي مسایلو ته اشاره کړې. افغانستان چې تازه له جګړو راوتلی، همکاریو او پیوستون ته اړتیا لري، باید په هره برخه کې هر اړخیزې مرستې ورسره وشي. »
فطرت د نړۍوالو هڅو په لړ کې د افغانستان قضیې په اړه د دوحې پروسه هم یو مهم ګام ياد کړی او همداراز یې هیله څرګنده کړې چې د اسلامي همکاریو سازمان لومړنۍ تخنیکي ناسته به عملي او رغنده پایلې ولري.
د چارو څارونکي بیا پر قطر او په ټوله کې پر اسلامي هېوادونو نیوکه کوي چې له تېرو څو کلونو راهیسې يې د افغانستان په اړه یوازې پر خبرو او د اعلاميو پر خپرولو بسنه کړې .
د سیاسي چارو شنونکی کامران امان وايي:« قطر له موږ سره څه کړې، غیر له ډېپلوماتیکو اړیکو بل یې څه ګټه موږ ته رارسېدلې. ۱۰ یا ۱۲ ټنه مواد یې رالېږلي، پر دې باندې ۳۵ میلیونه کسان بسیا کېږي. دې هېواد کې ۵۰ کاله جګړه شوې. موږ له ۵۰ کاله وروسته یوې نسبي سولې ته رسېدلي یو.»
د قطر بهرنیو چارو وزارت په اعلامیه کې همدارنګه د اسلامي همکاریو سازمان غړو هېوادونو د بهرنيو چارو وزیرانو د تماس ډلې ناستې په اړه هیله څرګنده شوې چې دا به عملي او رغنده پایلې ولري، څو د اسلامي ورورولۍ روحیه انځور او د افغانستان پر وړاندې یو مسوول او ګډ چلن ته وده ورکړي.
د افغانستان په اړه د اسلامي همکاریو سازمان د غړيو هېوادونو بهرنيو چارو وزیرانو د تماس ډلې لومړنۍ ناسته د روان کال د تلې میاشت کې پرېکړو پلي کولو لپاره د ګټور میکانیزم جوړولو او د همکاریو پیاوړتیا په موخه په نیویارک کې ترسره شوې وه.
