اېکسپرېس ټرېبیون ورځپاڼې راپور ورکړی چې اسلام اباد به راتلونکې اوونۍ د اسلامي همکاریو سازمان د ناستې کوربه وي.
که څه هم د پاکستان حکومتي سرچينو ورځپاڼې ته د ناستې د اجنډا په اړه کره معلومات نه دي ورکړي، خو دا خبره یې ورته تایيد کړې چې په جريان کې به يې د غړيو هېوادونو استازي په افغانستان کې د بشري حقونو پر وضعيت او په ځانګړې توګه د نجونو پر زده کړو يو لړ مهم بحثونه ولري.
د اېکسپرېس ټرېبیون ورځپاڼې د راپور یوه برخه کې راغلي: « په داسې حال کې چې د کنفرانس کره اجنډا لا نه ده معلومه او یا پټه ده، خو یو شمېر سرچینو ویلي چې یوه اصلي موخه يې د نجونو پر زده کړو د محدوديت بیا کتنې لپاره د افغانستان پر سرپرست حکومت فشار راوړل دي.»
خو ځيني کارپوهان د اسلامي همکاریو سازمان ناستې له دې کبله سمبولیکې بولي چې په خبره يې په تېرو څه باندې درېيو کلونو کې يې د افغانستان پر وضعيت اغېز نه دی لرلی.
د سیاسي چارو شنونکی توریالی همت وايي: « موږ کومه عملي تمه ترې نه لرو، دا سازمان یوازې د بادارانو په خوښه خبرې کوي او عملي کوي. دوی اوس د افغانستان د نجونو د تعلیم خبره وړاندې کړې، دا خو ټول افغانان غواړي، زه د اسلامي امارت غړی یم، زه یې هم غواړم او وایم چې د اسلامي او افغاني کلتور تر چتر لاندې باید په همدې را روانه حمل میاشت کې مکتبونه خلاص شي. په دې کې د نړیوالو کار نه شته.»
رسمي سرچينو رسنیو ته په دې ناسته کې د شاوخوا۳۰ هېوادونو د بهرنيو چارو وزيرانو ګډون تایيد کړی، خو د اسلامي امارت د سرپرست حکومت د استازي ګډون په اړه یې څه نه دي ويلي.
سرپرست حکومت هم د اسلامي همکاريو سازمان په راتلونکې ناسته کې د خپل ګډون په اړه واضېح څه نه دي ويلي، خو ځينې شنونکي د دې سازمان له ادرسه د نجونو د زده کړو په اړه د پورته کېدونکي غږ پر ملاتړ ټينګار کوي.
د سیاسي چارو شنونکی صدیق منصور انصاري وايي: « هغه غونډې چې د افغانستان د خلکو په خیر وي، د افغانستان ولس ته نېک زېري ولري، موږ یې تل ملاتړ کوو؛ مګر هغه غونډې چې د افغانستان د خلکو د تاریخي دښمنانو له لمنې یا تر لمنې لاندې ترسره کېږي، موږ هېڅکله د هغو ملاتړ نه کوو، نه یې پایلې ښې بولو او نه به ښې پایلې ولري.»
د اسلامي همکاریو سازمان په راتلونکې ناسته کې داسې مهال د نجونو پر زده کړو د بحث اټکل کېږي چې سرپرست حکومت د نجونو زده کړې له شاوخوا درېيو کلونو راهيسې په نا څرګند امر ثاني پورې تړلې دي.
