Skip to content
افغانستان ته د اسلامي نړۍ د علماوو په استازولۍ راغلي پلاوي،د خپل شپږ ورځني سفر جزئيات له رسنيو سره شريک کړل.
ديني عالمان وايي، د سفر په لړ کې یې د اسلامي امارت لوړو پوړو مسوولينو سره ليدلي او د نجونو کار او زده کړو په تړاو یې ورسره بحث او خبرې کړي دي.
د راغلي پلاوي په خبره چې د لوړو زده کړو سرپرست وزیر سره تر ليدنې وروسته يې ډاډ ورکړی،چې د نجونو د زده کړو بیا شروع کيدو لپاره يې ګډه کميټه ټاکلې،چې د ستونزو حل وروسته به خپله پريکړه وروستۍ کړي.
د اسلامي نړۍ ديني علماوو پلاوي غړی محمد الصغير وايي:« د لوړو زده کړو وزیر موږ ته ډاډ راکړ، چې زده کړې د نجونو حق دی او موږ هېڅکله نه غواړو،چې له دې حقه يې محرومې کړو.د دې لپاره موږ يوه ګډه کميټه ټاکلې ده او د اسلامي اصولو په رڼا کې به دوی ته د کار او زده کړو زمينه برابروي. د اسلامي نړۍ دريځ همدا دی،چې زده کړه د ټولو نارينه او ښځينه وو اسلامي حق دی.»
د اسلامي نړۍ علماوو د ترهګرۍ پر وړاندې د اسلامي امارات مبارزه وستايله او څرګنده يې کړه،چې اسلامي امارت تر حاکميت وروسته توانيدلی،چې په افغانستان کې افراطي ډلې وځپي.
د اسلامي نړۍ ديني علماوو پلاوي غړی محمد الصغير وايي:« د الله ج شکر اداء کوو،چې په افغانستان کې امن او ثبات منځ ته راغلی دی او هېواد وروسته له نږدې څلور نيمو لسیزو د يوه مرکزي حکومت څښتن شوی دی. اسلامي امارات په نشه يي توکو بنديز لګولی او د افراطي ډلو په ځپلو توانيدلی دی.»
دغه راز د اسلامي نړۍ ديني علماوو نيوکه وکړه،چې د نړۍ ځيني هېوادونه غواړي،چې افغانستان په سياسي او اقتصادي انزوا کې انحصار کړي او له دغه وضعيته د وتلو لپاره يې د ټولې نړۍ په اسلامي او نورو هېوادونو غږ وکړ،چې افغانستان په رسيمت وپیژني او نور دې د امريکا اشارې ته په تمه نه پاتې کيږي.
