پوره دوه اوونۍ وشوې چې د اسلامي جمهوریت پلاوی د قطر پلازمېنې دوحې ته تللی او له طالبانو سره یې ګډه ډله جوړه کړي چې د کاري اصولو چوکاټ برابر کړي.
د اسلامي جمهوریت د مذاکراتي پلاوي غړي نادر نادري د شنبې په ورځ رسنیو ته مالومات ورکړي او ویلي یې دي چې طالبان ځینو مواردو کې خپلمنځي بحثونه او پرېکړې ځنډوي.
نادر نادري وایي: ((د طالبانو په وړاندیزونو موږ خپل بحثونه پای ته رسولي، خو د طالبانو خپلمنځي بحثونه او پرېکړې ځنډنۍ دي. زموږ پلاوی د عمومي مجلس پیل ته چمتو دی، خو طالبان نه دي چمتو شوي.))
نادر نادري د خلکو اندېښنو ته په ځواب کې ویلي چې د کابل سیاسیتونه د مذاکراتي پلاوي په کارونو او سولې پروسه باندې کوم اغیز نه لري.
هغه دغه راز وایي: ((د تماس ډلې تېرو ورځو کې اتلس مواردو باندې موافقې ته رسېدلي دي. د خبرو لپاره چوکآټ مشحص دی او د کابل سیاسیتونه د دوحې په مذاکرتو کوم اغیز نه لري.))
نادري افغاني رسنیو سره خبرو کې دا هم ویلي چې طالبان له امریکا سره شوې هوکړه کې ځینو مواردو باندې عمل نه کوي او دا موارد یې حیثیتي کړي دي.
هغه ډاډ ښودلی چې افغان پلاوی هېڅکله له خپلو ارزښتونو څخه نه په شا کېږي او که بحثونه هر څومره اوږده کېږي، دوی به یې دفاع کوي.
نادري وایي: ((د تاوتریخوالي له زیاتېدو د وسیلې په توګه طالبان کار اخلي چې پر حکومت د خلکو فشار زیات شي. موږ د ارزښتونو په دفاع کې نه ستړي کېږو او هر څومره بحثونه چې وي، چمتو یو چې و یې کړو.))
هغه ویلي چې د خلیلزاد څرګندونې د مذاکراتي ټيم دریځ نه شي بدلولی.
هغه په خپل وضاحت کې ویلي چې د امریکا او طالبانو ترمنځ خبرې ساده او اسانه، خو بین الافغاني مذاکرات ډير پیچلي او موضوعات یې ډېر دي چې باید بحث پرې وشي.
