نوموړي دغه لارښوونې په کندهار کې د دولتي ادارو چارواکو ته د روزنيز سيمنار په پای کې کړې او ټينګار يې کړی، چې له خلکو سره پر نرمښت سربېره دې په زندانونو کې هم له بنديانو سره ښه چلن وشي.
د اسلامي امارت رهبر ګونډو، يتيمانو او بېسرپرسته کورنيو ته د رسېدنې ډاډ ترڅنګ چارواکو ته په سپارښتنه کې د شرعي اصولو پر رعايتولو هم ټينګار کړی.
د اسلامي امارت مشر شیخ هبتالله اخوندزاده په کندهار کې د وزارتونو او دولتي ادارو چارواکو لپاره په جوړ شوي درې ورځني روزنیز سیمینار د پای په مراسمو کې د وينا پرمهال چارواکو ته مهمې لارښوونې کړې.
د اسلامي امارت مرستیال ویاند وايي، چې نوموړي په ياد سيمينار کې د خلکو د دین، عقیدې، امنیت او د یتیمانو، کونډو، معلولینو او بې سرپرسته کورنیو خدمت د اسلامي امارت هم ژمن دی.
د اسلامي امارت مرستیال ویاند حمدالله فطرت وايي: اختلاف ونه کړې، (( د یو بل اطاعت وکړئ، د الله ج په دین لاسونه ټینګ کړئ، له یو بل سره محبت وکړئ، له یو بل سره مرسته وکړئ، خلکو ته زیری ورکړئ، کارونه پر وخت او اخلاص سره خلاصوئ، د غریب او مالدار توپیر مه کوئ او په خپلو کارونو کې شریعت ته ترجیح ورکړئ. ))
د اسلامي امارت رهبر ويلي چې د بندیانو د حقونو په اړه يې فرمان صادر کړی، چې له مخې به یې بندیان نه ځورول، نه وهل او نه هم شکنجه کېږي.
نوموړي ټینګار کړی، چې په اسلامي نظام کې د هر مسلمان عزت او وقار خوندي دی، د زندانونو مسوولانو ته یې سپارښتنه کړې، چې زندانیانو ته تعلیم او تربیې زمینه برابره کړي او زندانونه دې د روزنې او تعلیم پر مرکزونو بدل کړي.
د اسلامي امارت مرستیال ویاند حمدالله فطرت زیاتوي: )) د بندیانو په حق کې اسلامي امارت په لومړیو کې فرمان صادر کړی وو، چې هیڅ بندي به نه ځورول کېږي او نه به شکنجه ورکول کېږي او د محکمې پرته به هیچاته سزا نه ورکول کېږي او دا اسلامي نظام دی او په اسلامي نظام کې د هر مسلمان عزت او وقار خوندي دي. اسلامي امارت د زندانونو رییسانو ته امر کړی چې استادان پیدا کړې او بندیانو ته زده کړې ورکړې او زندانونه په تعلیمي مرکزونو بدل کړي.((
شیخ هبتالله اخندزاده چارواکو ته لارښوونه کړې، چې په خپل کار او خپلو فیصلو کې د شریعت پلي کېدو ته ترجیح ورکړی.
نوموړي دا لارښوونه هم کړې، چې چارواکي او مسوولان دې په اخلاص، رحم او د شریعت له مخې د خلکو خدمت وکړي.
حمدالله فطرت همداراز څرګندوي: (( امیرالمومنین وویل د اسلامي امارت قوانین د څو کسانو رایه نه ده او دا ټول د الله ج احکام دي او د اسلامي امارت فرمانونه د الله ج په مخلوق باندې د ترحم او شفقت لپاره دي چې پر همدې بنسټ د خلکو سره د همکارۍ په موخه ادارې جوړې شوې دي. ))
د اسلامي امارت رهبر له دې وړاندې ورته څرګندونې کړې وې او له ولس سره یې پر نیک چلن ټینګار کړی وو.
