د اسلامي امارت رهبر د خپلو ولایتي سفرونو په دوام بلخ ولایت ته رسېدلی او هلته یې د يوې غونډې پرمهال له ځايي چارواکو او ديني عالمانو سره ليدلي دي.
نوموړي مسوولانو ته په خطاب ویلي، د اسلامي نظام د ساتلو لپاره هڅې وکړئ او د ده اوامر دې لومړی پر ځان او بیا پر نورو خلکو عملي کړي.
هبة الله اخوند زاده زیاته کړې، ديني علما او چارواکي دې په خپلو کې يووالی ټینګ کړي او د مشرتابه له حکمونو په اطاعت سره دې خپلمنځي اختلافونه د شريعت په چوکاټ کې حل کړي.
د اسلامي امارت مرستیال ویاند حمدالله فطرت وايي: « امیرالمؤمین علما د افغاني ټولنې لارښود وګڼل او سپارښتنه یې وکړه چې د هېواد د بېلابېلو قومونو او ولسونو ترمنځ د شخړو په هواري کې له مسوولینو سره ګډ کار وکړي او دغه راز یې د هېواد ټول قومونه، خلک او مسوولین اتفاق او اتحاد ته را وبلل.»
د سیاسي چارو کارپوهان ولایتونو ته د اسلامي امارت د رهبر سفر مهم ګڼي او وایي، چارواکي باید د خلکو غوښتونو ته د لومړیتوب په ورکولو سربېره د دوی ستونزو ته پر وخت رسېدنه وکړي، ترڅو د ملت او حکومت ترمنځ د احتمالي واټن مخنیوي وشي.
د سیاسي چارو کارپوه ادریس محمدي ځاځی وايي: « دلته عام ولس او چارواکو ته مهم پیغامونه ورکول کېږي. چارواکو ته پیغام دا دی چې باید له اختلاف او نفاق څخه لاس واخلي؛ بله خبره دا ده چې په صادرېدونکو احکامو کې تبیعض ونه شي، یعنې دا چې یو فرمان په لویه کچه عملي کېږي خو بل ته هېڅ پاملرنه نه کېږي.»
د اسلامي امارت رهبر څو ورځې وړاندې فاریاب، سمنګان، کندز او جوزجان ولایتونو ته هم سفرونه وکړل او هلته یې له ځایي مسوولینو، دیني عالمانو او قومي مشرانو سره په کتنه کې د شرعي احکامو پر پلي کولو ټینګار کړی.
یو شمېر نور کارپوهان وایي، د اسلامي امارت رهبر دې هغه غوښتنې عملي کړي چې په ولايتونو کې خلکو ترې کړې دي.
د سیاسي چارو کارپوه محمد زلمی افغانیار وايي: « د حکومتولۍ په برخه کې دغه سفرونه ډېر اغېزناک دي؛ د ملت او حاکمیت ترمنځ واټن له منځه وړي او له بلې خوا محلي چارواکي په دې پوهېږي چې خلک کولی شي جګ پوړو چارواکو ته لاسرسی ولري او د هغو کړنو په اړه شکایت وکړي چې د هېواد له ملي ګټو سره ټکر لري.»
دا په داسې حال کې ده چې د اسلامي امارت رهبر له دې مخکې د شمال زون ۲۱۷ عمري قول اردو له مسوولینو او علماوو سره په کتنه کې پر اخلاص، اطاعت او تقوا ټینګار کړی و او له دوی يې غوښتې وو چې له هغو اختلافونو ډډه وکړي چې د بې باورۍ لامل کېږي.
