د اسلامي امارت رهبر شیخ هبت الله اخوندزاده په کندهار ولایت کې د ټولو ولایتونو له والیانو سره کتلي دي.
د اسلامي امارت مرستیال ویاند حمدالله فطرت وايي، کتنه کې د رهبر له لوري والیانو ته د ښې حکومتولۍ، مسوولیتونو ته د پاملرنې، د شریعت پلي کولو، د نظام ساتنې او د اسلامي نظام پیاوړتیا سپارښتنه شوې.
فطرت په دې اړه وايي:« په دې غونډه کې د مشرتابه له خوا والیانو ته د ښې حکومتولۍ، مسوولیتونو ته د پاملرنې، د شریعت پلي کولو، د نظام ساتنې او د اسلامي نظام د پیاوړتیا سپارښتنه شوې.»
فطرت وايي، د اسلامي امارت رهبر په دې کتنه کې والیانو ته سپارښتنه کړې، چې د خلکو عقیدتي او فکري اصلاح ته دې پاملرنه وکړي او هېچا ته دې د غیر شرعي فعالیت ترسره کولو اجازه نه ورکوي.
د اسلامي امارت رهبر په دې کتنه کې له ديني علماوو سره د والیانو پر نږدې همکارۍ سربېره ټینګار کړی، چې والیان باید د دین په تنفیذ کې له علماوو مشوره واخلي.
فطرت زیاتوي: « مشرتابه والیانو ته سپارښتنه وکړه، چې د خلکو فکري او عقیدتي او د ځوان نسل سالمې روزنې ته پاملرنه وکړي او خپلې چارې له علماوو سره په مشوره ترسره کړي.»
د سیاسي چارو کارپوهان له چارواکو سره د اسلامي امارت رهبر لیدنې په اوسنیو شرایطو کې د ولس د ستونزو حل او غوښتونو لپاره مهمې بولي او ټینګار کوي، چې دولتي ادارو او ولایتونو کې والیان باید له خلکو سره نرم چلن غوره کړي او دغه راز یې ستونزو ته پر وخت رسېدنه وکړي.
د سیاسي چارو کارپوه روح الله هوتک وايي: « له حکومتي چارواکو سره د زعیم ناسته یو غوره ګام دی. والیان به په دې ناسته کې د افغانانو ستونزې مخامخ تر مشرتابه ورسوي او کېدای شي د حل لارې ورته ومومي.»
له دې وړاندې د اسلامي امارت رهبر د ملي دفاع او کورنیو چارو سرپرستانو او دغه راز د استخباراتو له عمومي رییس سره په لیدنه کې پر امنیتي وضعیت او په امنیتي سکټور کې د ستونزو پر حل خبرې کړې وې.
