د بدخشان ولایت سیمه ییز چارواکي د واخان کورېډور د سړک جوړونې چارو ژر بشپړولو په تړاو د اسلامي امارت د مشرتابه د جدي حکم له صادرېدو خبر ورکوي.
د بدخشان والي ویلي، د واخان سړک جوړونې پروژه د دوی له لومړیتوبونو څخه ده او په دې تړاو د اسلامي امارت رهبر ځانګړی حکم صادر کړی چې د واخان کورېډور سړک جوړونې چارې دې ژر تر ژره بشپړې او دغه پروژه دې ګټه اخستنې ته وسپارل شي.
مولوي محمد اسماعیل غزنوي زیاته کړې: « دا یوه ستره پروژه ده، ځینې فکر کوي چې ښايي کارونه یې لا نوي پيل شوي دي، خو د امیرالمومنین له لوري د دې لارې د پروژې ژر بشپړېدو لپاره ځانګړی او عاجل حکم صادر شوی چې ژر تر ژره دې د واخان کورېډور سړک جوړونې چارې بشپړې او ګټه اخستنې ته دې وسپارل شي.»
اقتصاد پوهان بیا وايي چې واخان کوریډور د توکو لېږد رلېږد او همدا راز په لوړه کچه ټرانزیټ په برخه کې نه یوازې افغانستان بلکې د ټولې سیمې لپاره ځانګړی ارزښت او اهمیت لري.
دوی وايي، د دې کوریډور په فعالیتو سره به سوداګر د سیمه ییزو بازارونو ترڅنګ، نړیوالو بازارتونو ته اسانه او ارزانه لاس رسی پیدا کړي.
د افغانستان او پاکستان د سوداګرۍ ګډې خونې مشر خانجان الکوزی وايي: « د افغانستان لپاره یې ځانګړی اهمیت دا دی چې موږ به د کراچۍ، بندرعباس او چابهار له ستونزو او احتیاج خلاص شو؛ ځکه له دې لارو چین سره زموږ تجارت ډېر قېمته تمامېږي.»
د اقتصادي چارو شنونکی عبدالجبار ساپی وايي: « واخان دهلېز د افغانستان او سیمې لپاره ډېر مهم دی؛ که دا دهلېز فعال او موږ له چین سره وصل شو، نه یوازې افغانستان ته به په اقتصادي برخه کې ډېرې لاسته راوړنې ولري بلکې پر کراچۍ او نورو بندرونو به زموږ اتکا په بشپړ ډول پای ته ورسېږي. واخان دهلېز نه یوازې افغانستان بلکې سیمې ته هم ګټه لري.»
ځينې نور بیا وايي چې دا کورېډور د افغانستان لپاره له اقتصادي پلوه سټراټيژیک اهمیت لري او په فعالېدو سره به یې په اسانه توګه منځنۍ او سوېلي اسیا سره وصل شي او همدا راز به افغان سوداګر اروپايي بازارونو ته هم لار پیدا کړي.
د اقتصادي چارو شنونکی ډاکټر صادق حمیدزوی وايي: « واخان کوریډور د افغانستان لپاره سټراټیژيک اهمیت لري، هم د اقتصاد، هم د سوداګرۍ او هم امنیت له پلوه. دا کوریډور کولی شي جنوبي او منځنۍ اسیا سره ونښلوي او موږ کولی شو اروپا ته هم له دې لاره لار پیدا کړو. همدارنګه دا د سمندري لارو یو معقول بدیل دی.»
په ټوله کې باور دا دی چې واخان کوریډور د کراچۍ بندر او همدا راز بحر ته د افغانستان د لاس رسي نه لرلو ښه بدیل دی او له دې سره به د افغانستان سوداګري او اقتصاد پرمختګ وکړي.
شنونکي وايي، واخان نړیوالو او سیمه ییزو بازارونو ته د لاس رسي لنډه لار ده او د نورو هغو په پرتله سوداګرو لپاره ارازنه تمامېږي.
د افغانستان او پاکستان د سوداګرۍ ګډې خونې مشر خانجان الکوزی په دې اړه وايي: « واخان دهلېز د افغانستان، چین او سیمې لپاره ډېر مهم دهلېز دی. دا د ورېښمو پخوانۍ لاره ده او اهمیت یې په دې کې دی چې واټن یې لنډ دی، هم خلیج او هم ترکیې ته له دې لارې تګ راتګ کېدای شي. دا لاره د چین د هغې پروژې په پرتله ډېره لنډه ده چې دوی غواړي د «یوه کمربند او یوې لارې» په نامه یې جوړه کړي.»
د معلوماتو له مخې، په دوه برخو کې د واخان کوریډور د سړک جوړونې چارې روانې دي چې د کتوونکو په باور، د دې پروژې په تکمیل سره به افغانستان له دې لارې له چین سره وصل او د سوداګرۍ ټرانزیټ او سیمه ییزو اقتصادي همکاریو لپاره به نوی باب پرانستل شي.
