د اسلامي امارت رهبر د پکتيا والي ملا مهرالله حماد، په شمول د دې ولايت د نظامي او ملکي ادارو مسوولينو سره په کتنه کې د نظام ساتنه د ټولو ګډو مسوليت بللی دی.
شیخ هبت الله اخندزاده مسوولینو ته د شرعي احکامو او په ځانګړي ډول د امربالمعروف او نهې عن المنکر قانون پر عملي کېدو ټېنګار کړی .
هغه زیاته کړې، مسوولین د خلکو په خدمت مکلف دي او د خلکو ترمنځ دوښمنۍ او اختلافات له منځه وړلو لپاره دې هڅې وکړي.
د اسلامي امارت مرستیال ویاند حمد الله فطرت وايي:« امیرالمومنین حفظه الله مسوولینو ته د اسلامي نظام د پیاوړتیا، د شرعت د تطبیق، د امر بالمعروف او نهې عن المنکر د قانون عملي کېدو او خلکو ته د خدمت کولو سپارښتنې وکړې. امیر المومنین حفظه الله پر مسوولینو غږ وکړ چې له خپلو وزارتونو سره همغږي وساتي، د خلکو ستونزو ته حل لارې پیدا کړي او قومي اختلافات له منځه یوسي.»
د اسلامي امارت رهبر اوسنی وضعیت د علم، اسلام ته د ښه خدمت کولو، او یووالي لپاره غوره فرصت بللی دی.
بلخوا د سیاسي چارو کارپوهان له ملکي او نظامي مسوولينو سره دغه ډول لېدنې د چارو ښه تنظيم او د یو لړ ستونزو حل لپاره ګټورې ګڼي.
د سیاسي چارو کارپوه محمد سلیم پيګیر وايي:« هرڅومره چې د افغانستان اسلامي امارت رهبر له خلکو سره په اړیکه کې وي، د هغوی ستونزې واوري دا به د افغانستان اسلامي امارت او د خلکو دواړو پر ګټه وي.»
ځینې نور بیا په دې باور دي چې اسلامي امارت دې د ملت مشروع غوښتنو منلو او دغه راز د ځينو شته ستونزو حل پراساس ځان نړيوال ته تعامل ته نږدې کړي.
د نړیوالو اړیکو کارپوه نجیب الرحمان شمال وايي:« هرکله چې د افغانستان ټولو خلکو دې مسایلو او غوښتنو ته پام ونه شي، نو پایلې به یې خطرناکې وي، د حکومت پر وړاندې به د خلکو لا زیاتو اختلافاتو او بې باورۍ لامل شي.»
دا په داسې حال کې ده چې له دې وړاندې هم د اسلامي امارت رهبر شمالي ولايتونو ته د سفر پر مهال مسوولين او عام خلک ملي يووالي ته رابللې وه او د قومي، ژبني او سمتي تعصب پر نه کولو يې ټینګار کړې وه.
