د ازموینو ملي ادارې چارواکو د دولتي ادارو د یو کلنو لاسته راوړنو تشرېح پروګرام په پیل کې خپلې یو کلنې لاسته راوړنې له رسنیو سره شریکې کړې.
د دې ادارې سرپرست عبدالباقي حقاني وایي، تېر کال له شاوخوا ۲۰۰ زره کسانو د روڼتیا اصل په پام کې نیولو سره د کانکور په ګډون ۷۰ بېلابېلې ازموینې اخیستل شوې دي.
حقاني په دې اړه وايي: « موږ الحمدالله د یو کال په دوران کې ۷۰ سترې او کوچنۍ ډله ییزې ازموینې اخیستې دي. په دغو ازموینو کې په مجموعي توګه ۲۱۰ زره ۹۶۱ تنو ګډون کړی و. په دې ازموینو کې د لوړو زده کړو وزارت اړوند امارتي پوهنتونونو لپاره د کانکور، د دینې مدارسو لپاره اختصاصي، د شپې پوهنځیو لپاره د ماسټرۍ او دوکتورا پروګرامونو ازموینې شاملې دي.»
حقاني دغه راز زیاتوي، د کانکور ازموینه کې د ګډونوالو لپاره د اسانتیاوو په موخه سږ کال په ختیځ او لوېدیځ نورستان کې دوې نوې حوزې رامنځته شوې، ترڅو متقاضیان په اسانۍ سره په یاده ازموینه کې برخه واخیستلی شي.
د ازموینو ملي ادارې سرپرست په دې اړه وايي: « د کډونوالو د شکایتونو اورېدلو لپاره ځانګړې پاملرنه شوې او د هرې ازموینې پایلو له اعلان وروسته په منظم ډول د شکایت کوونکو شکایتونه ثبت کېږي او څېړل کېږي. په ۱۴۰۴ کال په نورستان ولایت کې د ختیځ نورستان او لوېدیځ نورستان لپاره هم د ازموینو حوزې رامنځته شوې او په ۱۴۰۵ کال کې به د بدخشان په واخان کې هم د ازموینو حوزه رامنځته شي.»
د ازموینو ملي ادارې مسوولین همدا راز زیاتوي، سږ کال له شاوخوا ۱۰۰ زره کسانو د کانکور ازموینه اخیستل شوې چې له ډلې به یې نږدې ۸۷ زره کسان لوړو او نیمه لوړو زده کړو پوهنتونونو او موسسو ته لار پیدا کړي.
د ازموینو ملي ادارې تخنیکي سلاکار یما امان وايي: « د لوړو زده کړو په چوکاټ کې د عمومي کانکور د ازموینې سږنیو ګډونوالو شمېر ۱۰۲ زره ۱۷۰ تنه و. دا شمېره د تېرکال په پرتله ۱۰ سلنه لوړه وه. له دغو داوطلبو کسانو به شاوخوا ۸۰ زره لوړو زده کړو ته جذب شي.»
د دې ادارې مسوولین همدا راز د متقاضیانو اړوند ستونزو له منځه وړلو ډاډ ورکوي او زیاتوي چې د تېر کال په لړ کې یې په همدې موخه د هېواد په ۷ زونونو کې خپلې څانګې پرانیستې دي.
