د اروپايي پارلمان ناسته د افغان ښځو په اړه د چهارشنبې پر ورځ د «۱۴۰۰ کال د سلواغې پر ۱۳ مه » هم روانه وه.
ناسته کې د اروپایي پارلمان مشرې روبیرتا میتسولا له ښځو سره د جنسیتي تبعیض غندنه وکړه او ټینګار یې وکړ،چې له اسلامي امارت سره دې هر ډول تعامل د ښځو حقونو ته په درناوي مشروط شي.
میتسولا زیاته کړه:« موږ له افغان ښځو سره د جنسیتي توپیر غندنه کوو. نړۍ باید د افغان ښځو اړتیاوو ته لومړېتوب ورکړي او طالبانو سره هر ډول تعامل د ښځو حقونو ته د درناوي لپاره یو شرط وګڼي.»
دې ناسته کې ته د بشری حقونو پخوانۍ مشرې سیما سمر، د افغان میرمنو وروستیو لاریونونو ته په اشاري ویلي، چې افغان میرمنې ښه وضعیت کې نه دي،خو لا هم د خپلو حقونو او بیان ازادۍ لپاره مبارزه کوي.
سمر زیاتوي:« د ناسم مشرتابه له امله باید اړمن خلک شکنجه نه شي. که اوسنۍ ستونزې حل نه شي، ناورین به لا پراخ شي. افغانان بشري مرستو ته اړتیا لري،دا باید له هغه سره مشروط نه وي، چې اوسني واکمن یې کوي.»
د اروپایي پارلمان ناستې ته د میدان وردګ پخوانۍ ښاروالې ظریفې غفاري هم وینا کړې ده.
غفاري زیاته کړه:« که نړیواله ټولنه له طالبانو د بشري او ښځو حقونو ته درناوي برخه کې ژمنه وانخلي، افغان ښځې به له منځه لاړې شي.»
اروپایي پارلمان کې که څه هم نیوکه شوې، چې اسلامي امارت د ښځو حقونه نه ورکوي، خو اسلامي امارت بیا په ټینګار ویلي، چې د ښځو حقونو ته ژمن دي او د اسلامي شریعت له مخې کولی شي زده کړه او کار وکړي.
