د حکومتي ادارو د یوکلنو لاسته راوړنو د تشریح د بهیر په لړ کې د چهار شنبې په ورځ (د ۱۴۰۳ کال د زمري پر ۱۷ مه) د احصایې او مالوماتو ملي ادارې خپل کلنی راپور له رسنیو سره شریک کړ .
د دغې ادارې مرستیال وايي، تېر کال د افغانستان په صادراتو کې کمښت راغلی او برعکس واردات کچه لوړه شوې.
عصتالله حکیمي وايي، په تېر کال کې افغانستان نږدې د دوه میلیارده ډالرو په ارزښت صادرات کړي،خو څه باندې ۸ ملیارده ډالرو په ارزښت یې واردات درلودل، چې د۱۴۰۱ کال په پرتله صادرات یې څه باندې ۳ سلنه راکم شوي او واردات یې بیا څه باندې ۲۲سلنه زیات شوي دي .
حکیمي زیاتوي:« ۱۴۰۲ کال کې مو د صادراتو کچه ۱.۸ میلیارد ډالره وه چې د ۱۴۰۱ کال پرتله ۳.۷ سلنه کموالی ښي او دا کچه د معدني ډبرو په تېره بیا د ډبرو سکرو برخه کې ده. همدارنګه ۱۴۰۲ کال کې د وارداتو ۸.۱ میلیارد ډالره وه چې د ۱۴۰۱ کال پرتله ۲۲.۴ سلنه زیاتوالی ښيي.»
په ورته وخت کې دغه اداره وايي، په تېر یوه کال کې یې څه باندې ۳.۲ میلیونه کسانو ته برېښنايي پېژندپاڼې وېشلي چې ۲۳ سلنه زیاتوالی ښيي او ټولیز عواید یې بیا څه باندې ۲ میلیارده افغانۍ دي.
د احصایې او مالوماتو ملي ادارې سرپرست فقیر محمد زیار وايي:« تېرکال د برېښنايي پېژندپاڼو د ۲۹ څانګو له لارې، چې له هغې ډلې پنځه یې د اسان خدمت اړوند دي، ۳ میلیونه ۲۶۶ زره برېښنايي پېژندپاڼې وېشل شوي، چې دا د ۱۴۰۱ پرتله شاوخوا ۲۳ سلنه زیاتوالی ښيي. د احصایې او مالوماتو ادارې په تېر ۱۴۰۲ کال کې د برېښنايي او کاغذي پېژندپاڼو د وېش، د تولد کارټونو، تاییدۍ،د پېژندپاڼو اصلاح او اړوندو نورو خدمتونو له درکه نږدې ۲ میلیارده ۵۲۱ میلیونه ۸۵۰ زره افغانۍ عواید راټول او د دولت خزانې ته سپارلي دي.»
د اسلامي امارات له راتګه تر دې مهاله نږدې ۸ میلیونه وګړو ته برېښنايي پېژندپاڼې وېشل شوي او د برېښنایي پېژندپاڼو د وې له پیله تردې مهاله بیا نږدې ۱۴ میلیونه افغانانو برېښنايي پېژندپاڼې اخیستې دي.
د احصایې او مالوماتو ملي ادارې د مالوماتو له مخې، دمګړۍ د ملکي خدماتو په برخه کې څه باندې در۳۵۰ زره کارکوونکي پر کار بوخت دي، چې ۸۰ زره یې ښځې دي او دا د تېر په پرتله ۱۰ سلنه زیاتوالی ښيي.
د احصایې او مالوماتو ملي ادارې مرستیال عصمت الله حکیمي وايي:« ۱۴۰۲ کال کې د ملکي خدمتونو کارکوونکو ټولټال شمېر ۳ لکه ۶۱ زره ۶۸۰ تنه دي چې ۲۸۱ زره ۴۳۹ نارینه او ۸۰ زره ۲۴۱ ښځي دي چې د تېر کال پرتله ۱۰ سلنه زیاتوالی ښيي.»
د دغې ادارې د راپور له مخې، په تېر یوه کال کې دهېواد ناخالص تولیدات ۱۵.۷ میلیارده ډالره اټکل شوي و، چې د ۱۴۰۱ کال پرتله ۲.۷ سلنه زیاتوالی په کې راغلی او همداراز د بهرنیو اسعارو او په تېره بیا د ډالرو پر وړاندې دافغانیو ارزښت هم لوړشوی.
په راپور کې راغلي، چې دغلو او دانو په برخه کې ۱۳ سلنه زیاتوالی راغلی او د پنبې تولید بیا ۶۹ سلنه زیات شوی، همدا راز په تېر یوه کال کې د څه باندې ۶ میلیارده افغانیو په ارزښت کانونه استخراج شوي چې ۴۰ سلنه زیاتوالی ښيي .
د احصایې او مالوماتو ملي اداره وايي، په تېر یوه کال کې یې څه باندې درې میلیارده افغانیو په ارزښت دولتي صنایع درلودل، چې دې برخه کې هم د ۱۴۰۱ کال پرتله ۲۹ سلنه زیاتوالی رغلی دی.
د احصایې او مالوماتو ملي ادارې سرپرست مرستیال عصمت الله حکیمي وايي:« ۱۴۰۲ کال کې د غلو برخه کې ۵ میلیونه ۲۰۶ زره ټُنه تولید او همدارنګه د پختې برخه کې ۱۲۲ زره ۴۵۵ ټِنه وه چې په ترتیب سره د تېر کال پرتله ۱۳ او ۶۹ سلنه زیاتوالی ښيي. همدارنګه ۱۴۰۲ کال کې د ۶ میلیارد او ۵۱ میلیونه افغانیو په ارزښت د کان کیندنې برخه تولیدات لرو چې د تېر کال پرتله ۴۰.۸ سلنه زیاتوالی ښيي. د دولتي صنایعو تولید بیا د ۳ میلیارد او ۲۰۶ میلیونه افغانۍ دي چې ۲۹ سلنه زیاتوالی ښيي.»
ددغې ادارې دمالوماتو په اساس چې په تیر ۱۴۰۲ کال کې دهیواد ټول نفوس ۳۵ اشاریه ۷ ملیونه اټکل شوی چې یو اشاریه پنځه ملیونه یې کوچیان ۹ اشاریه دوه ملیونه یې په ښارونو کې او ۲۵ ملیونه وګړي یې بیا په کلیو کې ژوند کوي .
دمالوماتو په اساس چې په تیرو یو کال کې د ۱۱ اشاریه ۵ ملیاردو افغانیو په ارزښت بهرنیو او خصوصي شرکتونو په افغانستان کې پانګونه کړې چې ۱۴ اشاریه ۳ سلنه زیاتوالی ښيي .
