سبا به د اته نویم مالي کال بودجه د تصویب لپاره ولسي جرګې عمومي غونډې ته وړاندې شي.
ولسي جرګه کې ځینې وکیلان وايي ، بودجه کې د ولایتونو ترمنځ انډیول په پام کې نه دی نیول شوی او د تصویب پرمهال به اعتراض وکړي.
مالیې وزارت بیا دغه ادعاوې ردوي او وايي د بودجې په سند کې د ټولو ولایتونو لپاره پراختیايي پروژې په پام کې نیول شوي .
نن یکشنبه د ولسي جرګې مالي اوبودجې کمیسیون د اته نویم مالي کال بودجې په تړاو له مالیې وزارت سره ګډه غونډه جوړه کړې .
د ولسي جرګې مالیې اوبودجې کمیسیون وايي، ټاکل شوې د اته نویم مالي کال د بودجې سند د تصویب لپاره د ولسي جرګې د دوشنبې ورځې عمومي غونډې ته وړاندې شي او هیله ښي یې چې وکیلان به ورته د تصویب رایه ورکړي .
خو د جرګې غړي بیا نیوکه لري چې د اته نویم مالي کال په بودجه کې د ولایتونو ترمنځ انډولیزه پراختیا په پام کې نه ده نیول شوې او شاید وکیلان ورته رایه ور نه کړي .
خو مالیې وزارت بیا وايي د بودجې په سند کې هیڅ ولایت له پامه نه ده غورځول شوی او د حکومت امکاناتو ته په کتو یې ورته پراختیايي پروژې په پام کې نیولې دي .
د بودجې په تړاو په دغه ګډه غونډه کې راغلو وکیلانو د خپلو ولایتونو لپاره د پراختیايي پروژو وړاندیزونه درلودل چې د مالیې وزرات له لوري په بودجه کې ځای پرځای شول او له ولسي جرګې یې وغوښتل چې بودجه تصویب کړي څو پراختیايي پروژې پر وخت پلې شي .
د دیارلس سوه اته نویم مالي کال ټوله بودجه درې سوه نهه نوي ملیارده افغانۍ ده چې یو سلو څلورویشت یې پراختیايي او پاتې نوره یې عادي بودجه ده .
ماليې وزارت په داسې حال کې ولسي جرګې ته بودجه د تصویب لپاره وړاندې کوي چې حکومت د ولسي جرګې معاشونه ځنډولي او ممکن ځینې د بودجې تصویب ته د تایید رای ور نه کړي.
