د افغانستان دیني عالماوو د سرتاسري شورا د سرپرست د پيژند ګلوۍ په اړه جوړه شوې غونډه کې علماوو په یوه خوله وویل، نور د وېرې وخت تېر شوی او له ملي ارزښتونو به په کلکه دفاع کوي.
غونډه کې د ولسمشرغني د یوه حکم له مخې محمد سردار ځدران د دیني علماوو سرتاسري شورا سرپرست په توګه ټاکلی او رسما نن دې شورا ته معرفي شو.
د حج اوقاف وزیر قاسم حلیمي په خپلو خبرو کې وویل، له دې مخکې ټولو دیني علماوو یو .دریځ نه درلوده او اوس به د کوم فشار او وېرې پرته له یوه سټیج خپل غږ پورته کوي
حلیمي زیاته کړه:« د علماوو درېځ به نور یو وي. د وېرې شپې نورې پای ته رسېدلي. موږ باید خپله دنده ترسره کړو.»
د دیني علماوو سرتاسري شورا سرپرست محمد سردار ځدران وايي: « له دې وروسته به دا خبره نه وي، چې دا د حج او اوقافو، د تعلیمات اسلامي او که د علماوو شورا ملا امام دی. له دې وروسته به پر ګډه کار کوو.»
بل خوا یو شمېر دیني علماوو بیا نیوکې هم وکړې، چې حکومت دینې علماوو ته صلاحیتونه نه ورکوي او څلوېښتم ریاست یې وخت ناوخت نیسي او له ځانه سره یې بیايي.
له افغان دیني علماوو د هېوادوالو ګېله داده،چې د بهرنیو هېوادونو د استخباراتي کړیو پرر وړاندې چې مخکښ یې د هغوی دیني عالمان دي، اغیزمن نه دي ثابت شوي.
