په کابل کې د ۳۴ ولایتونو لسګونه دیني عالمان راټول شوي او روانه جګړه یې یوازې افغان وژنه او وحشت وباله.
دوی د جګړې له ښکېلو اړخونو وغوښتل چې دا بې مانا جګړه پای ته ورسوي او ژرتر ژره دې تلپاتې اوربند وکړي.
علماوو وویل، طالبان او حکومت د عامو خلکو پر وژنې او بې کورۍ امتیاز ترلاسه کوي او که اوربند ونه کړي د دوی له سخت غبرګون سره به مخ شي.
دیني عالم عبدالقادر وايي:« اوسنۍ جګړه شرعي جواز نه لري او دا جګړه افغان وژنه ده. دا جګړه د افغانانو تر منځ نه، موږ تل غږ پورته کړی دی، خو چا زموږ غږ نه دی اوریدلی، لکه څنګه چې جګړه بهرنیو رهبري کوله د سولې خبرې هم د خپلو ګټو لپاره بهرني رهبري کوي.»
دیني علماوو نیوکې وکړې چې حکومت او طالبان د سولې لپاره ښه نیت نه لري او یوازې خلک په اعلامیو تېرباسي.
دوی وايي، هغه دیني عالم چې د حق ویلو غږ پورته کوي، په مرموز ډول وژل کېږي او نور دې د افغان وژنې لړۍ بنده شي.
دیني عالم جمال الدین فایق وايي:« څه دلیل لرئ راځئ! له جګړې لاس واخلئ، سوله وکړئ. زموږ عزت او پت په سوله کې دی او د ملت حیات یوې تلپاتې سوله کې دی.»
دیني علما وايي، هغه شرطونه چې د سولې خنډ ګرځیدلي دي باید لري شي او د دوحې د خبرو لګښت دې پر کور دننه په پراختیايي کارونو ولګول شي.
علماوو پر طالبانو غږ وکړ، چې نه جمهوریت او نه امارت ورته مقدس دی او د پاکستان له ديني علماوو یې وغوښتل،چې په افغانستان کې دې له لاسوهنې ډډه وکړي.
د علماوو شورا مشر حبیب الله حسام وايي:« دواړه انعطاف وکړئ، نه جمهورت مقدس دی او نه امارت. یوازینۍ د وتو د لاره هغه لاره ده،چې قران موږ ته ښودلې.»
دیني علماوو له سیاسي ګوندونو هم وغوښتل، چې د بې ګناه افغان وژنې مخنیوي لپاره دې له شخصي ګټو تېر شي او د سولې په پروسه کې دې چټک ګامونه پورته کړي.
