په کابل کې یو شمېر دیني عالمان راټول شوي او یو ځل بیا یې روانه جګړه افغان وژنه وبلله او د جګړې له ښکیلو غاړو یې غوښتنه وکړه،چې جګړه بنده او د سولې مذاکرات چټک کړي.
دوی وايي، جنګ نه، بلکې سوله ښکاره فتحه ده او ښکیل اړخونه باید له شرط پرته سوله وکړي.
د عالمانو په خبره، روانه جګړه فقر، بېکاري او ظلمونه زیاتوي،چې بهرنیو هېوادونو ته هم د لاسوهنې زمینه برابروي.
د کابل دیني عالمانو شورا مشرر عبدالقادرر قانت وايي:« نن کار او روزګار نه شته. د هرڅه وده له منځه تللې. خلک له غربت سره مخ شوي دي.»
د کابل حج او اوقافو مشر شیر محمد شیرزی وايي:« دا جګړه ګټونکی نه لري. د دې جګړې پایله دا ده، چې زرګونه ښځې یې ګونډې او ماشومان یې یتیمان کړل.»
د کابل والي محمد یعقوب حیدري وایي، عالمان باید منځګړیتوب وکړي او روان تاوتریخوالي ته د پای ټکی کېږدي.
حیدري وايي، دولت تل انعطاف کړی او په خبره یې مقابل لوری هېڅ انعطاف نه کوي او تل پر خپل دریځ ثابت پاتې دي.
حیدري زیاته کړه:«۴۰ کلني جګړې، وینې توئیدنې موږ چېرته ورسولو. دا جګړه د چا، د څه لپاره او د څه په خاطر دوام کوي.»
دلته راغلي دیني عالمان بیا وایي، لومړی باید د جګړې عامل له منځه یوړل شي،هغه چې په وینا یې په دیني او دنیوي کچه دي.
دلته یادونه وشوه،چې افغانستان کې جګړو ته لمن هغه خواوې وهي،چې د اوبو له مهار، د ځمکنۍ بشپړتیا او د کادرونو له روزنې وېره لري.
