دیمتري پولېوانسکي وايي،د داعش فعالیتونه پرخپل حال دي،چې دا په سیمه کې د بې ثباتۍ یوازنی فکتور دی.
دیمتري زیاته کړې:« د داعش ډلې افغان څانګه اوس هم په هېواد کې د بې ثباتۍ یوازنی فکتور دی. د آیډیالوژۍ، تبلیغاتو او د استخدام فعالیتونه د هغوی ګواښ نور هم زیات کړی دی. هغوی په خپلو فعالیتونو کې له ډېرو اغیزناکو اطلاعاتو او ارتباطي ټکنالوژۍ هم کار اخلي.»
پولېوانسکي وايي، په افغانستان کې وروستۍ بمي چاودنې او ځانمرګي د دې ثبوت دی،چی د دغې ډلې شتون او بشري ځواک نه دی ختم شوی.
پولېوانسکي زیاتوي:« موږ په افغانستان کې هم د هغوی شتون ګورو او ګاونډیو او د مرکزي اسیا هېوادونو ته د هغوی ګواښ ګورو. له وروستیو ترهګریزو بریدونو او ځانمرګو ښکاره څرګندیږي،چې د دې ډلې بشري قوه هېڅ نه ده راکمه شوې.»
پولېوانسکي د ملګرو ملتونو له امنیت شورا هم وغوښتل،چې پر القاعده ډلې او داعش لګیدلي بندیزونه عملي کړي.
اخوا اسلامي امارات څو ځلې وړاندې هم ویلي وو، او اوس هم پر دې دریځ ولاړ دي،چې داعش د یوې ډلې په توګه نه افغانستان او نه هم د سیمې هېوادونو ته ګواښ پیښ کولای شي.
