د افغانستان لپاره د ملګرو ملتونو سرمنشي ځانګړې استازې دیبرا لاینز امنیت شورا ته د افغانستان د حالاتو په اړه ویلي، د افغانانو مقاومت په جدي ډول ازمویل کېږي او د یو لړ ناوړه حالت خواته ورښوویدل نه شي ردیدلی.
لاینز خبرداری ورکړی، چې افغانستان کې پېښیدونکي حالت پایلو اغیزې به پر ټوله نړۍ وغورځېږي.
په ورته وخت کې هغې دا خبرداری هم ورکړی، چې د زور او یا پوځي حکومت د رامنځ ته کولو لپاره هر ډول هڅې به د افغانستان د خلکو، سیمه ییزو هېوادونو او په لویه کچه د نړیوالې ټولنې ارادې خلاف وي.
لاینز همدارنګه له ټولو غړو دولتونو وغوښتل،چې د بشري مرستو د ځواب ورکولو له پلان سره سخاوتمندانه مرسته وکړي،چې د دولت د روانو بشري اړتیاوو او پرمختګ ملاتړ وشي.
لاینز زیاته کړې، دوی به له ټولو اړخونو افغان حکومت،سیمه ییزو مشرانو او نړیوالې ټولنې سره خپل کار ته دوام ورکړي،چې د ډېرې اړینې سولې لپاره منسجم ملاتړ پیاوړی شي.
لاینز دا هم ویلي:« زه یو ځل بیا افغانانو ته ډاډ ورکوم چې ملګري ملتونه به دوی یوازې نه پریږدي او خپل کار ته به دوام ورکړي.«
لاینز دا څرګندونې داسې مهال کوي،چې د افغانستان بېلابېلو برخو کې جګړو زور اخېستی دی.
