د اذربایجان په کوربه توب او د ملګرو ملتونو بشري مېشتېدنې ادارې« یو. اېن. هبیتات» له لوري د نړیوال ښاري فورم دیارلسمه ناسته(ډبلیو.یو.اېف ۱۳) د روانې مې میاشتې له ۱۷ تر ۲۲ پورې دوام کوي.
په دې ناسته کې د افغانستان په ګډون د ګڼو هېوادونو لوړ پوړو چارواکو او د نړیوالو سازمانونو استازو، متخصصینو او زرګونه عامو کسانو ګډون کړی.
د چاپېریال ساتنې عمومي ادارې د خبر پاڼې په خپرولو سره په دې فورم کې د یادې ادارې د رییس مطیع الحق خالص په مشرۍ د پلاوي له ګډون خبر ورکړی.
په خبر پاڼه کې راغلي، د دې ادارې پلاوی به د فورم په بېلابېلو تخنیکي او تخصصي غونډو کې د افغانستان د چاپېریالي وضعیت، اقلیمي بدلون ناوړه اغېزو او د ښاري چاپېریال ننګونو په اړه له نړیوالو سازمانو او ادارو سره خپل لیدلوري او اړتیاوې شریک کړي.
د چاپېریال ساتنې عمومي ادارې ویاند محبالله بهار وايي: « د افغانستان اسلامي امارت پلاوی به د یاد فورم په بېلابېلو تخصصي او تخنیکي غونډو کې د افغانستان د چاپېریالي وضعیت، د اقلیمي بدلون له امله رامنځته شویو ستونزو، وچکالۍ، د چاپېریال ککړتیا، د ښاري چاپېریال ننګونو او د دوامداره ښاري اړتیاوو پوره کولو لپاره د افغانستان لیدلوری له نړیوالو سره شریک کړي. همدارنګه پلاوی به په دې برخه کې د افغانستان کړي کارونه هم وړاندې کړي.»
د نړیوال ۱۳ ښاري فورم ناستې پرانسته د کوربه هېواد د ولسمشر له لوري شوې چې نوموړي په خپلو خبرو کې د دوامدارو او خوندي ښارونو پر جوړولو، د اقلیمي بدلون پر وړاندې د ګډې مبارزې، د ښاري خدماتو پر پیاوړتیا او د نړیوالو همکاریو پر ارزښت ټینګار کړی او دغه راز یې د دې ناستې لپاره د اذربایجان په کوربه توب، د باکو نړیوال باور ته یو مهم پرمختګ یاد کړی.
د اذربایجان ولسمشر الهام علي اېف وايي: « په ریښتیا هم دا زموږ لپاره ستر ویاړ دی چې د نړیوال ۱۳ ښاري فورم ناستې کوربه توب کوو. په د ې ناسته کې د ۱۸۲ هېوادونو استازي سره یو ځای شوي. دا د اذربایجان د درناوي څرګندونه کوي. د ګډونوالو شمېر د ریکارډ په کچه لوړ دی او دا د دې ښودنه کوي چې دا مسئله ډېره ارزښت لرونکې ده او کوربه هېواد هم هغه هېواد دی چې نړیوالې اړیکې یې پراخې دي. دا فورم زموږ لپاره یو ښه چانس دی چې ګډونوالو او نړیوالې ټولنې ته خپل فرصتونه وښیو او له هغوی هم زده کړه وکړو.»
دې نړیوالې ناستې ته د اذربایجان ولسمشر ترڅنګ د ملګرو ملتونو سرمنشي انټونیو ګوټېرېش هم انلاین وینا کړې او له نړیوالې ټولنې یې غوښتي چې د اقلیمي بدلون، بې نظمه ښاري پراختیا او نورو چاپېریالي ستونزو د ګډې همکارۍ په برخه کې عملي ګامونه واخلي.
د ملګرو ملتونو بشري مېشتېدنې ادارې اجراییوي رییسې ویلي، د نړیوال ۱۳ ښاري فورم ناستې مهمه مسئله به یې په نړیواله کچه د بې نظمه کور جوړونې پر اوسني بحران بحث وي چې د پالیسیو او حل لارو په اړه یې ګډې پرېکړې کېږي .
د ملګرو ملتونو د بشري مېشتېدنې ادارې اجراییوي رییس اناکلاودیا راسباخ وايي: « موږ پر کور جوړونې تمرکز کوو. موږ اوسمهال د کور جوړونې نړیوال بحران کې ژوند کوو او د نړیوال ښاري فورم په دې ناسته کې اساسي تمرکز پر کور جوړونې دی. موږ تمه لرو چې د باکو په دې څو ورځو کې داسې پالیسۍ او حل لارې ومومو چې د بحرنوانو مخینوي ته لارښود او په نړۍ کې د خلکو ستونزو ته رسېدنه په کې وشي.»
د چاپېریال ساتنې متخصصین د ځنګلونو او طبیعي شنو سیمو ساتنه، په ښاري چاپېریال کې د ککړې هوا پر لاملونو څار، د اوبو سپما او د سرچینو یې ساتنه، د کثافاتو منظم مدیریت او لمریزې برېښنا تولید د چاپیریال ساتنې لپاره مهم مسایل یادوې.
