Skip to content
د اسلامي امارت لوړپوړی دولتي پلاوی درې ورځې وړاندې قطر ته د هېواد د پنځو نړیوالو هوايي ډګرونو د تخنیکي برخو د ترمیم او فعالېدو د قراردادونو په موخه دوحې ته ولاړ او لاهم هم هلته دی.
د افغانستان اسلامي امارت بهرنیو چارو وزارت د یوې خبرپاڼې په خپرولو سره ویلي،پرون د هېواد د بهرنیو چارو سرپرست وزیر امیر خان متقي د قطر د لومړي وزیر د مرستیال او د دغه هېواد د بهرنیو چارو له وزیر محمد بن عبدالرحمن آلثاني سره کتلي دي.
خبرپاڼه کې ویل شوي، لېدنه کې دواړو لوریو دذ ځینو سیاسي مسایلو سربېره یې د هېواد د هغو پنځو نړیوالو هوايي ډګرونو د قراردادونو په هغو ټکو خبرې او بحثونه کړي،چې تر اوسه پورې پرې هوکړې ته نه دي رسېدلي.
د خبرپاڼې یوه برخه:« په دغه ناسته کې په یو لړ سیاسي او اقتصادي موضوعاتو سربېره د افغانستان د هوايي میدانونو د قرارداد په هغو ټکو خبرې وشوې،چې لا تراوسه پورې پرې دواړه لوري توافق ته نه دي رسېدلي.»
قطر او ترکیې سره وروسته له هغې د افغانستان هوايي ډګرونو د ساتنې او تخنیکې چارو سمبالولو پرسر خبرې وشوې،چې واک ته د اسلاميامارت له رسیدو د کابل نړیوال هوايي ډګر له تخنیکي پلوه تر اوسه پورې نړیوالو الوتنو ته جوګه نه دی،خو ګاونډ او سیمې ته ترې الوتنې شوې دي.
د خبرپاڼې یوه برخه:« په لېدنه کې دواړو خواوو هغه ټکي مشخص کړل،چې لا زیات بحث او وضاحتونو ته اړتیا لري. له پلان سره سم د افغانستان، قطر او ترکیې تخنیکي ټیمونه په ګډه کار کوي،ترڅو د هوايي ډګرونو فعالېدو اړوند یوې هوکړې ته ورسېږي.»
دوحې ته له کابله تللي پلاوي له قطري چارواکو سربیره د یو شمیر هېوادونو استازو سره هم لېده کاته کړي دي.
د بهرنیو چارو سرپرست وزیر امیرخان متقي د دغه سفر په ترڅ کې دافغانستان لپاره د د بریټانیا له سفیر سره کتنه کې پر ځینو مسایلو خبرې او بحثونه کړي دي.
