شنونکي وايي،افغان پلاوی دې له امریکا وغواړي،چې له دې وروسته دې افغانستان سره د یوه خپلواک هېواد په توګه خپل ټول مسایل مخامخ مطرح کړي او نور دې د درېیم هېواد له لارې افغانستان سره اړیکه نه نیسي.
دوی وايي، امریکا دې افغانستان د یوه مستقل هېواد او دولت په توګه وپیژني.
شنونکی عزیز معارج وايي:« د افغانستان پلاوی باید له امریکا سره خبرو کې له افغان ولس سره د بشري او قتصادي مرستې مطرح کړي او حکومتدارۍ په تړاو باید مرستې وغواړي او دا مسله دې هم له امریکايي چارواکو سره مطرح کړي،چې له دې وروسته دې امریکا له افغانستان سره خپلې اړیکې د یوه خپلواک او قانون مند هېواد په توګه تامین کړي نه د قطر یا پاکستان هېواد په وسیله. یعني افغانستان دې د یوه مستقل دولت په توګه وپیژني.»
د بهرنیو چارو چارسمبالي امیر خان متقي پر مشرۍ دوحې ته تللي افغان پلاوي تر دې مهاله له قطري چارواکو سره لیدلي دي او په یو شمیر مهمو مسایلو یې خبرې کړي دي، په دغو خبرو کې په افغانستان کې د بشري ناورین مخنیوي، اقتصادي بحران په مهارولو او بشري مرستو بحثونه شوي دي.
په ورته مهال د افغانستان د بهرنیو چارو وزارت چارسمبالي وزیر په دوحه کې د افغانستانه له سفارته هم لېدنه کړې.
