د قطر پلازمېنه دوحه کې د افغان جهتونو ترمنځ د سولې دوه ورځنۍ خبرې پرته له کومې ملموسې هوکړې او د اوربند په اړه له پرېکړې پرته پای ته ورسېدې.
دواړه لوري وایي، په مهمو مسایلو یې ازاده فضاء کې بحثونه کړي او په نږدې ورځو کې به دا ډول ناستې دوام وکړي.
د ملي روغې جوړې عالي شورا مشر ډاکټر عبدالله عبدالله وايي: « یو او بل سره مو واضح خبرې او بحثونه درلودل. بل دا چې مقابل لوري سره مو شناخت زیات شو، څو مسلې چې په اعلامیه کې راغلي دي، هغه د لوړې کچې خبرو دوام دی، پرته له کومې وقفې. زموږ هېله داده چې په څو اونیو کې به بیا خبرې ژر پیل شي.»
د طالبانو د سیاسي دفتر مشر ملا عبدالغني برادر وايي:« موږ دوه ورځو کې په ښه فضاء کې مذاکرات او بحثونه وکړل، د افغانستان د معضلې د حل لپاره مو په مهمو مسایلو باندې بحثونه وکړل چې په نږدې راتلونکي کې به دا ډول ناستې دوام وکړي، انشاءالله .»
اوربند او د راتلونکي حکومت څرنګوالی دوه هغه ټکي دي چې افغانستان کې پرې جګړه پای ته رسېږي، خو دلته په دې ټکو باندې نه کومه هوکړه وشوه او نه هم ترې یادونه شوې ده.
بل خوا هغوی چې د سولې بهیر له نږدې څاري وایي، دا مذاکرات د خلکو تمې خلاف پای ته ورسېدل او په وینا یې پایله یې سر له اوسه سمه نه ښکاري.
د خلاصون لارې شورا مشر سید اکبر اغا وايي: « ښه خبره دا وه چې دوی په ځینو مواردو کې هوکړه کړې وه که څه هم لږ به وای د ملت او خلکو هیلې به پیداشوې وې، خو دوی په درې څلور مسایلو باندې هېڅ توافق ونه کړ،چې دا خلک پر راتلونکو ناستو بې باوره کوي.»
د سیاسي چارو شنونکی طارق فرهادي وايي:« جنګ په قدرت باندې ده او ایډیالوژي د جنګ لپاره استفاده کېږي، موږ باید دا قبول کړو، کوم کسان چې جنګ کې دي او یا یې عامل دي په دوو مختلفو قطبونو کې ولاړ دي، د خبرو له لارې د افغانسان مسله ژر نه حل کېږي، اوس باید ولیدل شي چې د جګړې په ډګر څه بدلون راځي.»
تمه کېږي چې له اختر وروسته هم د سولې خبرې دوام پیداکړي.
خو افغانستان کې د جګړې دوام ملت ته دواړه لوري ملامت دي، چې هره ورځ قرباني ورکوي.
اوس به ولیدل شي چې راتلونکي کې د مذاکراتو پایله څه اوسي.
