دوحه کې د سیاسیونو او طالبانو ترمنځ غونډې ته حکومت خپل پلاوی نه لېږي.
د سیاسیونو او طالبانو ترمنځ ناسته د بین الافغاني خبرو لپاره زمینه برابرول دي.
کابل کې د امریکا سفیر جان باس ویلي، امریکا نه غواړي د سولې برخه کې په افغانانو څه تحمیل کړي.
د افغان حکومت وسلوال او سیاسي مخالفین داځل په دوحه کې سره راټولیږي هغه ځای چې امریکا او طالبانو په کې د افغان سولې پرسر پنځه پړاوه بې پایلې بحثونه کړي.
حکومت چې لا د دې خبرو په محور کې نه دی ورګډ شوی قوي باور نه کېږي چې په دا ډول غونډو سره افغانان خپله راتلونکې روښانه وویني.
تحلیل کوونکي وایي، سره له دې چې دا مخالف جهتونه د افغانانو استازولي نه شي کولای خو له دې امله مهمه ده چې خپلمنځیو خبرو ته لار پرانیزي.
ها خوا امریکا هم ویلي، نه غواړي د سولې برخه کې په افغانانو څه تحمیل کړي.
افغان حکومت دې ناستې ته پلاوی نه ورلیږي او برخوال یې یوازې طالبان او سیاسیون دي، ځکه د حکومت له نظره دا غونډه د سولې عملي بحث کېدای شي، نه مذاکرات.
یوه اندېښنه له دې ناستې دا ده چې کېدای شي د حکومت دا دواړه مخالف لوري د حکومت پښې ووهي، خو د امریکا لپاره دا مذاکرات د افغانانو ترمنځ یو ډیالوګ دی او پرېکړې خپله افغانانو پورې اړه لري.
کابل کې د امریکا سفیر جان باس داسې ویلي (( هغه خبرې چې افغان حکومت يې باید له طالبانو سره وکړي امريکا يې نه کوي او بايد خپله افغانان يې وکړي او دوی په دې برخه کې افغان ملت ته درناوی کوي. په دې برخه کې موږ افغانانو ته خاص درناوی لرو ترڅو خپلې خبرې په خپله وکړي. او موږ نه غواړو چې د جوړ جاړي په برخه کې په افغانانو څه تحميل کړو.))
افغان حکومت د مسکو له ناستې هم داسې ویره درلوده لکه اوس چې د دوحې په اړه لري خو د غونډې ټول تمرکز افغانستان کې د سولې پرڅرنګوالي او بین الافغاني خبرو په برابرولو ور ټول یادیږي.
