د کونړ ولایت نورګل ولسوالۍ د مزار درې ۳۶ زلزله ځپلو کورنیو ته د ملي دفاع وزارت له لوري جوړ شوي استوګنیز کورونه وسپارل شول.
د یاد وزارت مسوولان وايي، د دغو کورونو پر جوړولو ۳۳.۶ میلیونه افغانۍ لګښت راغلی چې د ملي دفاع وزارت له بودیجې تمویل شوي دي.
د دوی په وینا، له دې اقدام یې موخه له هغو خلکو سره همکاري ده چې د تېر کال زلزلو ورته درانه ځاني او مالي زیانونه واړول.
د ۲۰۱ خالد بن ولید قول اردو مرستیال مولوي محمد نظامي وايي: « موږ د ملي دفاع وزیر صاحب په هدایت په مزار دره کې شاوخوا ۳۶ کورونه چې په کې د استوګنې خونې، تشنابونه، پخلنځی او د اړتیا وړ ابادي شته، بې سرپناه خلکو ته برابر او جوړ کړي دي. دلته مو یو محراب لوی مسجد هم جوړ کړی.»
زلزله ځپلي د دغو کورونو له جوړېدو خوښ دي او وایي، د اوږدې مودې له سختو شرایطو وروسته یې د سرپناه مهمه ستونزه هواره شوه.
خو دوی ټینګار کوي چې لا هم ګڼې کورنۍ بې کوره دي او د داسې مرستو په تمه دي چې موجوده وضعیت او بې کوره کېدل یې ورسره پای ته ورسېږي.
دوی له مسوولینو غواړي چې سړکونه، ویالې، سربندونه او نور عامه بنسټونه چې زیانمن شوي ورغوي، ترڅو خلک بېرته عادي ژوند ته ستانه شي.
د زلزلو له امله اغېزمن شوی کس وايي: « داسې یې وګڼه چې په سلو کې ۱۶ فیصده خلکو ته کورونه جوړ شوي، خو ۸۶ فیصده نور لا هم سرپناه نه لري. دوی لا هم په خېمو کې پراته دي او د ډېرو خېمې هم بادونو شکولې دي.»
یوبل اغېزمن شوی کس وايي: « زموږ کورونه ټول ویجاړ شوي وو، اوس یې دا دی څه کورونه جوړ کړل، خو ډېر لاهم پاتې دي او خلک په خېمو کې ژوند تېروي. بې سرپناه خلک له بارانونو سخت تنګ دی او اړتیا ده چې هغوی ته هم ژر کورونه جوړ شي.»
چارواکي بیا ډاډ ورکوي چې د پاتې بېکوره کورنیو د سرپناه ستونزې هوارولو ته ژمن دي او وایي، حکومت به د زلزله ځپلو د ژوند ښه کېدو او د زیانمنو شویو سیمو د بیارغونې لپاره خپلې هڅې دوامداره وساتي.
د ۲۰۱ خالد بن ولید قول اردو مرستیال په دې اړه وايي: « موږ ډاډ او اطمینان ورکوو چې ټولو بې سرپناه پاتې کورنیو ته به هم کورونه جوړ کړو.»
شاوخوا یوولس میاشتې وړاندې د کونړ ولایت د مزار دره یوې زورورې زلزلې ولړزوله چې له امله یې خلکو ته درانه ځاني او مالي زیانونه واوښتل.
په دې زلزله کې زرګونه استوګنیز کورونه ویجاړ او ګڼ عامه بنسټونه زیانمن شول چې لا هم د سیمې اوسېدونکي د بیارغونې او لومړنیو خدمتونو د بشپړېدو په تمه دي.
