افغان ځواکونو وړمه شپه پر ډیورنډ فرضي کرښه پرتو پوستو سربېره، یو ځل بيا په راولپنډۍ کې د پاکستان پوځي رژیم د نور خان هوايي اډه، په بلوچستان کې د کویټې۱۲م قول اردو، د خېبر پښتونخوا په مهمندو ایجنسۍ کې د خویزو کمپ او ځینې نور مرکزونه په نښه کړي دي.
ملي دفاع وزارت دا بریدونه پر کابل، بګرام او ځینو نورو سیمو د پاکستان پوځي رژیم د تېرې ورځې او تېرې شپې د بمباریو په غبرګون کې ترسره کړي.
د ملي دفاع وزارت مسوولان زیاتوي، په دې بریدونو کې پاکستاني لوري ته پراخ زیانونه اوښتي.
د ملي دفاع وزارت ویاند عنایت الله خوارزمي وايي: « هېواد والو! ستاسو د ډاډ لپاره باید ووایم چې ځینې وختونه د مزدور او ناکام دښمن الوتکې زموږ له فضا څخه تېرېږي، خو ستاسو اولادونه او مجاهدین ستاسو د ساتنې لپاره پر دغو الوتکو ډزې کوي. تاسو په دې اړه اندېښنه مه کوئ او ډاډه اوسئ چې ستاسو اولادونه ستاسو دفاع کولی شي. پتمنو هېوادوالو! د ملي دفاع وزارت اتلو ځواکونو د پاکستان له پوځي رژیم سره د جګړې له پیل راهیسې ګڼې لاسته راوړنې لرلې. تر اوسه د دښمن له ۱۰۰ ډېر کسان وژل شوي او دغه راز د پاکستان نظامي رژیم له ۲۵ ډېرې پوستې هم نیول شوې دي.»
د اسلامي امارت هوايي ځواکونو د پاکستان پر وړاندې د لومړي ځل لپاره هوايي بریدونه د فبروري میاشتې په وروستیو کې په جمرود، نوښار او فیض اباد کې ترسره کړل. د ملي دفاع وزارت د معلوماتو له مخې، په دغو بریدون کې د پوځي رژيم نظامي مرکزونه په نښه شول. که څه هم د ملي دفاع وزارت ویلي وو چې په دغو بریالیو بریدونو کې درانه زیانونه اوښتي، مګر کره جزئیات یې نه دي ورکړي.
د اسلامي امارت د دغو ځوابي بریدونو په تعقیب او د ډیورنډ فرضي کرښې په اوږدو کې د افغان ځواکونو او پاکستاني ملېشو ترمنځ د څو ورځو پرله پسې جګړو له امله، د لنډي کوتل په سیمه کې بېړنی حالت اعلان شو.
د خیبرپښتونخوا د خیبر ولسوالۍ ځایي چارواکو ویلي، د امنیتي وضعیت خرابېدو له امله یې په لنډي کوتل کې ټولې دولتي او خصوصي تعلیمي ادارې تر نامعلومې مودې پورې تړلې دي.
د پوځي چارو کارپوهان وایي، اسلامي امارت د ملګرو ملتونو منشور له مخې حق لري چې خپلې خاورې دفاع وکړي او پاکستان پوځي رژیم ته بالمثل ځواب ورکړي.
د پوځي چارو کارپوه اختر محمد راسخ وايي: « د پاکستان پوځي رژیم دا جګړه د غربي هېوادونو په اشاره پيل کړې او مخته یې وړي. زه ویلی شم چې دا جګړه به د دوی لمنې ته رسېږي او په دې جګړه کې به د پاکستان ښارونه لولپه شي.»
د ملي دفاع وزارت د معلوماتو له مخې، د يادو عملياتو له پيل راهیسې له ۱۴۰ زيات پاکستاني پوځيان وژل شوي او۳۱ پوستې ترې نيول شوې دي. چارواکي زیاتوي، د پاکستان پوځي رژیم له شپږو زیاتې بې پیلوټه الوتکې هم د ځواکونو له لوري رانسکورې شوې دي.
له بلې خوا، اسلام اباد کې د اسلامي امارت پخوانی سفیر پر افغانستان د پاکستان پوځي رژیم بریدونه له نړیوالو قوانینو ښکاره تېری بولي او وايي، د پاکستان پوځي رژیم په پرله پسې ډول په سیمه او په ځانګړې توګه افغانستان کې د ناامنیو رامنځته کولو پروژې تعقیبوي.
اسلام اباد کې د اسلامي امارت پخوانی سفیر مولوي عبدالسلام ضعیف وايي: « د پاکستان اوسنۍ ستونزې د دوی د غلطو پالیسیو نتیجه ده او دا به ورځ تر بلې لا پسې ډېرېږي. دوی د خپلو ناسمو پالیسیو پټولو لپاره افغان بهانه کړي او د سیمې نا امنه کولو هڅه کوي.»
د چارو شنونکي په دې باور دي چې د اسلامي امارت له خوا محاسبه شوي ځوابي اقدامات کولی شي د پاکستان پوځي رژیم په راتلونکي کې د افغانستان د فضایي حریم د نقض په اړه د ځوابي بریدونو له ویرې فکر کولو ته اړ باسي.
