د ملي دفاع وزارت تایید کړه چې د تېرو کلونو په پرتله سږکال هیواد کې جګړې زور اخیستی دی.
د ملي دفاع وزارت وايي، د هیواد په ختیځ٬ سویل ٬شمال او لویدیځ کې افغان ځواکونه په یو وخت له وسله والو طالبانو سره په جګړه بوخت دي.
د ملي دفاع وزارت داسې انګیري چې طالبانو د سولې خبرو کې د امتیاز اخیستو لپاره جګړه زیاته کړې خو جګړه کې یې ماتې خوړلې.
د بادغیس په امنیه قومندانۍ٬ په ننګرهار ولایت کې د واده په مراسمو ځانمرګی برید او د غزني ولایت د امنیت په ریاست باندې له بریدونو او مخامخ جګړې سره یو ځای ښکاري چې جګړې شدت پيدا کړی.
د ملي دفاع وزارت مرستیال ویاند، فواد امان مني چې د هیواد په څلورو خواوو کې د وسله والو طالبانو بریدونو زور اخیستی دی.
د ملي دفاع وزارت مرستیال ویاند ادعا کوي چې د هیواد په لسو ولایتونو کې هرشپه افغان ځواکونه عملیات لري چې لږ تر لږه یوسل او پنځوس طالبانو ته مرګ ژوبله اړوي.
د ملي دفاع وزارت د خالد عملیات بریالي ګني او زیاتوي وسله والو طالبانو د مخامخ جګړې په ډګر کې ماتې خوړلې او اوس غواړي په عامه ځایونو په ښارونو کې بریدونه وکړي.
