دفاع او کورنیو چارو وزیران او افغانستان کې د ناټو قومندان هم کندز ته تللي.
کندز ته د کورنیو چارو او دفاع وزیران او په افغانستان کې د بهرنیو ځواکونو عمومي قومندان هم تللي دي.
دفاع وزیر اسدالله خالد وايي، د طالبانو هغه پلان یې ناکام کړی، چې ګڼې کندز به سقوط کړي.
کندز کې افغان ځواکونو ته د تعرضي حالت امر شوی دی.
امنیه قومندان ویلي، کندز ته له کابل څخه د ۳۰۳ قطعې خاص ځواکونه هم ور رسېدلي او ډېر ژر به کندز ښار له طالبانو خالي کړي.
اوس هم د کندز ښار په مهمو سیمو او دولتي ودانیو باندې جګړه روانه ده.
طالبانو ادعا کړې، چې د کندز سېدرک، خاکنۍ او برنج بازار سیمې نیولي او اوس د مخدره توکو پر وړاندې د مبارزې ریاست باندې جګړه روانه ده.
په دغه جګړه کې د ښکېلو خواوو سربېره ګڼ شمېر ملیکانو ته هم مرګ ژوبله اوښتې ده خو دقیق ارقام یې په لاس نه شته.
په جګړه کې روغتون ته د ټپيانو د انتقال لارې بندې دي طالبانو روغتونونو ته لارې بندې کړي او یوازې ملکیانو ته اجازه ورکوي، چې روغتون ته انقال شي.
د روغتون رییس محمد نعیم منګل وايي، له سهار راهیسې تر اوسه دوی ته ۶۵ ټپيان ور وړل شوي، چې ښځې او ماشومان هم په کې شامل دي.
کندز کې خصوصي مخابراتي شبکې کار نه کوي او دغه ښار ته ټولې تللې لارې د ترافیکو پرمخ بندې دي.
