عمر داودزي ويلي، تمه لري چې په ۲۰۱۹ م کال کې به افغانستان کې جګړه پای ته ورسېږي.
د افغان سولې برخه کې د سیمه ییزې اجماع لپاره د ولسمشر غني استازی داودزی چې په څلور ورځیني سفر پاکستان ته تللی ویلي، چې افغانستان کې سوله تر هغه وخته نشي راتللی، څو طالبان له افغان حکومت سره مخامخ خبرو ته حاضر نه شي.
داودزي ویلي، د پاکستان لومړی وزیر افغانستان کې سوله غواړي او په دې تړاو یې نښې لیدلي دي.
له دې سره ډیر ژر به پاکستان کې د افغان او پاکستاني علماؤ غونډه جوړه شي، چې څنګه کولی شي په افغانستان کې جګړه ختمه او سولې ته لار هواره کړي.
د سیمې هېوادونو ته د خلیلزاد څلورم سفر
ټاکل شوې، د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد نن هند ته لاړ شي.
د راپورونو له مخې، زلمی خلیلزاد به هلته له لوړپوړو هندي چارواکو سره وګوري او د افغان سولې په تړاو به ورسره خبرې وکړي.
تمه ده چې خلیزاد به بیا چین، پاکستان او افغانستان ته هم سفر وکړي.
دا سیمې ته د خلیلزاد څلورم سفر دی چې د افغان سولې لپاره یې کوي، خو دا ځل سعودي او قطر ته نه ځي.
له افغانستان د امریکايي سرتېرو وېستل
له افغانستان د امريکايي ځواکونو د وتلو پر پلان کار پیل شو.
ویل کېږي، له افغانستان د ٧٠٠٠ امريکايي سرتېرو د اېستنې په اړه د ولسمشر ټرمپ له لارښوونې وروسته اوس پر دغه پلان کار پيل شوى.
خو سيپنه ماڼۍ کې دوه لوړ پوړو چارواکو د نوم نه ښودو په شرط واشنګټن پوسټ ورځپاڼې ته ویلي، ښایي په لومړیو کې له اووه زرو ډیر کم ځواکونه له افغانستان وباسي.
پوځي سلاکارانو ولسمشر ټرمپ ته ویلي، اوسمهال له افغانستان په تدریجي توګه د کمو ځواکونو اېستل ګټور دي.
خو چارواکو بیا دا خبردارى هم ورکړى چې وروستۍ پرېکړه لا نه ده شوې او ټرمپ هره شېبه د ټولو ځواکونو د اېستلو حکم کولی شي.
د طالبانو او امریکايي چارواکو ترمنځ خبرې
ټاکل شوې راتلونکې اونۍ طالبان او امریکا په دوحه کې خبرې وکړي.
ځینو طالب سرچینو ویلي، د دوی او امریکا ترمنځ مخامخ خبرې به د جنورۍ پر پنځلسمه دوحه کې وشي.
ټاکل شوې وه چې چهارشنبه او نن پنجشنبه د قطر پلازمېنې دوحه کې د طالب او امریکایې استازو ترمنځ خبرې وشي، خو د سرچینې په خبره سعودي او پاکستان نه غوښتل چې دا خبرې په قطر کې وشي، نو وځنډیدې.
خو طالبانو لا تر اوسه له امریکایانو سره د جنورۍ پر پنځلسمه رسماً د خپلو خبرو تائید نه دی کړی.
په همدې حال کې د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد د سیمې هېوادونو او افغانستان ته یو ځل بیا سفرونه پيل کړي دي.
راتلونکې حکومت کې د طالبانو د ونډې په تړاو د ایران غوښتنه
ایران وایي، طالبان باید د افغانستان په راتلونکې کې رول ولري.
د ایران د بهرنیو چارو وزیر محمد جواد ظریف ویلي، طالبان باید د افغانستان په راتلونکې کې رول ولري، خو په وینا یې دا سخت دریځه ډله باید حاکم رول ونه لري.
ظریف له هندي چارواکو سره د خبرو لپاره نوي ډيلي ته تللی او هلته یې دا خبرې له (این ډي) ټلوېزیون سره په مرکه کې کړي دي.
جواد ظریف ویلي، تهران له طالبانو سره استخباراتي اړیکې لري او په خبره یې ایران اړ دی چې د طالبانو تر ولکې لاندې سیمو کې د خپلو ګډو پولو امنیت وساتي.
هغه ویلي، دا پرېکړه چې طالبانو ته په افغانستان کې څه ډول رول ورکوي، د افغانانو کار دی، خو زیاته کړې یې ده چې د افغانستان ګاوندي هېوادونه نه غواړي چې طالبان پر ټول هېواد واک ترلاسه کړي.
