د امر بالمعروف نهې عن المنکر او شکایتونو اورېدلو وزارت په تیرې سلواغې یا دلوې میاشت کې د خپلو فعالیتونو راپور وړاندې کړ.
دغه وزارت د تېرې یوې میاشتې فعالیتونو په پایله کې نږدې یو زر ۲۰۰ شکایتونو ترلاسه کړي چې ډېرو کې یې د کارونو ځنډولو له امله پر محاکمو شکایت شوی.
یاد وزارت په تېره یوه میاشت کې نږدې ۲۸ د شخړو قضیې چې دوښمني او نور مسایل هم په کې شامل و، حل کړي او همدا راز ۳۰ تنو ښځو ته یې شرعي حقوق ورکړي چې د میراث او نکاح حقونو سربېره د ښځو پر وړاندې د تاوتریخوالي د مخنیوي قضیې او له کورني بند د خوشې کېدو حقوق هم په کې شامل دي.
د امربالمعروف، نهې عنالمنکر او شکایتونو اورېدو وزارت ویاند سیفالسلام خیبر وايي: « د مېرمنو د ټولو شرعي حقونو خوندیتوب او ورکړې ته په ژمنتیا، د۳۰ مېرمنو حقوق تضمین شوي، ثبت شوي او ورکړل شوي دي. له دې ډلې ۹ مېرمنې د میراث له حقونو برخمنې شوې، د ۱۰ مېرمنو د اجباري نکاح مخنیوی شوی، ۷ مېرمنې له کورني تاوتریخوالي ژوغورل شوې او ۲ نورې له کورني بند آزادې شوې دي.»
د دې وزارت د مالوماتو له مخې، د تېرو درې نیمو کالو په موده کې د ټول هېواد پر کچه له شپږ زرو زیاتې ښځې له جبري نکاح ژغورل شوې دي.
په ورته مهال خیبر وايي، د روژې میاشتې په را رسېدو سره له ټولو هټۍ والو او سوداګرو غواړي چې نرخونه لوړ نه کړي او همدا راز د خپله راکړه ورکړه له شرعي اصولو سره برابره کړي.
دغه راز خیبر خبرداری ورکوي چې د امربالمعروف او نهې عن المنکر قانون د ۱۸ مې مادې پربنسټ، محتسبین حق لري چې په سوداګریزو معاملاتو کې د سود، خش، احتکار او دېته ورته نورو ناجایزو مسایلو مخنیوی وکړي.
خبیر په دې اړه وايي:« په ټولو هېوادوالو غږ کوو چې د روژې مبارکې میاشتې په مناسبت او په مجموع کې په هر وخت کې د مسلمان لپاره دا څه ناوړه، غیر شرعي او هغو کارونو ډډه وکړي چې زموږ خدای او دین منع کړي وي. یوازې دا نه چې ځانونه به مو له ګناه ساتلي وي، ترڅنګ به مو ټولنه له لوږې، فقر، احتیاج او بل ته له لاس نیولو ساتلې وي.»
هرکال د روژې په را رسېدو سره د افغانستان په بازارونو کې د خوراکي او غیرخوراکي توکو بیې لوړېږي چې بیا عام خلک نه شي کولی په اسانۍ سره په روژې میاشت کې د خپلې اړتیا وړ خوراکي توکي را ونیسي.
