پښتون ملت پال سیاستوال او د پاکستان سنا مجلس پخوانی غړی وايي، افغانستان د بې پیلوټه الوتکو(ډرون) په کارولو سره د دواړو هېوادونو ترمنځ د جګړې بڼه بدله کړې او پاکستان ته یې لوی سرخوږی جوړ کړی.
افراسیاب خټک ویلي، افغانستان د بې پیلوټه الوتکو په کارولو سره غواړي پوځي تقابل ته دوام ورکړي.
د نوموړي په خبره، افغانستان کې د پاکستان په بریدونو کې د ښځو او ماشومانو په ګډون ملکي وګړي شهیدان شوي او بې کوره شوي دي.
افراسیاب خټک زیاته کړې: « د افغانستان له خوا په پاکستان د بې پیلوټه الوتکو بریدونو د دواړو هېوادونو ترمنځ د جګړې بڼه بدله کړې او پاکستان ته یې لوی سرخوږی جوړ کړی. په لومړیو کې جنګ یوازې د ډیورنډ فرضي کرښې په اوږدو کې متمرکز و، خو افغانستان اوس د بې پیلوټه الوتکو په کارولو سره پوځي تقابل ته دوام ورکوي.»
افراسیاب خټک دا څرګندونې داسې مهال کړې چې د ملي دفاع وزارت د معلوماتو له مخې، افغان هوايي ځواکونو د پاکستان د وروستیو بریدونو په ځواب کې د اسلام اباد په فیض اباد او خیبر پښتونخواه په کوهاټ کې پوځي اهداف د بې پیلوټه الوتکو په وسیله په نښه کړل.
ملي دفاع وزیر له دې وړاندې ویلي وو چې که د پاکستان پوځي رژیم کابل او یا د هېواد کوم بل ښار په نښه کړي، نو اسلام اباد به ارامه پاتی نه شي.
په ورته مهال، شنونکي د پاکستان بمباریو ته ځواب ورکول د افغانستان حق بولي او وايي، د بې پیلوټه الوتکو په کارولو سره د پاکستان په زړه اسلام اباد کې اهداف په نښه کړي.
دوی زیاتوي، د افغانستان ځواکونو د بې پیلوټه الوتکو په کارولو سره د پاکستان پوځي رژیم ته ستره ستونزه راولاړه کړې.
د سیاسي چارو شنونکی استاد مسعود وايي: « د هغو امکاناتو په کارولو سره چې افغانستان یې په واک کې لري او هغه ځواب چې افغانستان یې دوی ته ورکوي، پاکستان څه چې نورو ډېرو هېوادونو لپاره هم د حیرانتیا وړ دي. زه فکر کوم د افغانستان په اړه د پاکستان حرکتونه فوق العاده ظالمانه دي او که ځواب ورنه کړل شي، لا به ظالمانه شي.»
د سیاسي چارو کارپوه نجیب الرحمن شمال وايي: « افغانستان هم له ځانه د دفاع په خاطر مجبور دی چې له خپلو شته وسلو څخه کار واخلي. که څه هم موږ پرمختللي توپونه، الوتکې او توغندي نه لرو، خو د هغو بې پيلوټه الوتکو په وسیله غاښ ماتوونکی ځواب ورکول کېږي چې د افغان ځواکونو له خوا جوړې شوې او د پاکستان تر زړه پورې رسېږي. دا وسیله اوس د پاکستان لپاره یوه لویه ننګونه ده.»
شنونکي دغه راز وايي، د جګړې دوام د هېڅ لوري په ګټه نه دی او د ستونزو حل ته سوله ییزې او ډېپلوماټیکې لارې چارې باید ولټول شي.
په ورته مهال، د سیمې ځینې هېوادونه هم هڅه کوي چې د کابل او اسلام اباد ترمنځ روانه جګړه بنده او شته ستونزې د خبرو له لارې هوارې کړي.
د چین بهرنیو چارو وزارت په وینا، ځانګړي استازي یې په دې اړه هلې ځلې پیل کړې دي.
