د پښتونخوا ملي عوامي ګوند مشر خوشحال خان کاکړ چې تازه یې د پاکستان پارلمان ته لاره پیدا کړې، د پارلمان غونډې ته په لومړنۍ وينا کې له افغانستان سره د ښو اړيکو پر رامنځته کېدو ټينګار کړی.
نوموړي ويلي، له افغانستان سره د پاکستان اړيکې باید د ورورۍ او برابرۍ پر بنسټ وي او پر ډیورنډ فرضي کرښه ټولې لارې بايد د تګ راتګ لپاره پرانستل شي.
هغه د لارو پرانستو او په اړيکو کې د مساواتو ترڅنګ دا غوښتنه هم کړې چې پاکستان دې افغانانو ته د ويزې ورکړه هم اسانه کړي.
د پښتونخوا ملي عوامي ګوند مشر ویلي: « موږ ته په کار ده چې له افغانستان سره د ورورۍ او برابرۍ پر بنسټ اړیکې وساتو. له افغانستان سره ټولې سوداګریزې لارې که هغه ښورابک دی، که چمن دی یا سپین بولدک دی، که غلام خان او تورخم دي، باید پرانیستل شي. له افغانستان سره د ویزو د ورکړې په برخه کې باید اسانتیاوې راوستل شي، که هغه روغتیايي ویزې دي یا د زدهکوونکو لپاره دي او یا هم سوداګریزې ویزې دي، د ټولو په ورکړه کې باید اسانتیاوې رامنځته شي.»
باور دا دی چې لر افغانان له افغانستان سره نږدې اړیکې غواړي او لامل یې هم له یو بل سره نه پرې کېدونکی شراکت دی، خو د پاکستان پوځي رژیم هڅه کړې چې د دوی ترمنځ واټن زیات او له یو بل یې لرې وساتي.
شنونکي وايي، د تاریخ په اوږدو کې د افغانستان هڅه دا وه چې له پاکستان سره ښه روابط ولري، خو په خبره يې دا پاکستان دی چې پر افغانستان یې لارې تړلې دي او پر خاوره یې د یرغل جنايت کوي.
د سیاسي چارو شنونکی شهزاده مسعود وايي: « زموږ ولس او حکومتونو تل دا هڅه کړې چې د پاکستان له ولس سره نېک او د متقابل درناوي پر بنسټ اړیکې ولرو. د لارو بندول یا د وېزو بندول باید د حکومتونو په تګلارو کې شامل نه وي. زه باور لرم هغه خبرې چې خوشال خان کاکړ کړې دي، دا حقیقت دی او پاکستان باید په خپلو پالیسیو کې اساسي تغییر راولي.»
ځینې نور بیا د تړل شویو لارو د پرانستې په تړاو د لرو افغانانو غږ پر ځای بولي او زياتوي، د دې کار زیان هم لرو افغانانو ته رسېدلی.
دوی وايي، لرو افغانانو ته په کار ده چې د پاکستان پوځ او رژيم د هغو پرېکړو غوڅ مخالفت وکړي چې په پايله کې يې د دوی سيمې ناامنه کېږي.
د سیاسي چارو شنونکی نجیبالله جامع وايي: « پر ډیورنډ فرضي کرښه د سوداګریزو لارو تړلو لوی لامل د پاکستان یرغل او د سوداګریزو تعاملاتو سیاسي کول دی. په دې اړه د لرو افغانانو غږ معقول او سنجیده دی؛ ځکه د دغو لارو تړلو لوی زیان د فرضي کرښې دواړو غاړو پرتو افغانانو ته رسېږي. زه له دوی غوښتنه کوم چې باید د هغو پاکستاني جنرالانو ګرېوان ته لاس واچوي چې غواړي د کرښې دواړو غاړو ته پرتو قومونو ترمنځ دښمنۍ جوړې کړي.»
له نږدې څلور میاشتو راهیسې پاکستان له خيبرپښتونخوا تېرې شوې لارې له افغانستان سره تړلې دي. دا لارې د افغانستان پر خاوره د پاکستان پوځي رژيم له لوري له تېري وروسته د افغان ځواکونو د غچ اخستنې عملياتو له پيل سره سمې وتړل شوې او ګومان دا دی چې له تړلو يې پاکستان د فشار وسيلې په توګه کار اخستل غوښتل، خو برعکس اقتصادي تاوان يې وکړ.
