د خوست ولایت په مرکز او ولسوالیو کې سږ کال ډېرې هندواڼې کرل شوي خو کروند وايي، د وچکالۍ له امله يې حاصلات ښه نه دي.
د دغه ولایت د علیشرو ولسوالۍ اړوند چرګوټي سیمې کروندګر وايي، که اړونده ادارې ورسره د کیمیاوي سرې، اصلاح شویو تخمونو او د اوبه خور سیستم په برخه کې همکاري وکړي ښایي له خپلو ځمکو لا ډېر عاید ترلاسه کړي.
ګروندګر فضل الرحمن وايي:« په دې کې حکومت هېڅ نه دي کړي ځکه تخمونه، سرې، سړې خونې، درمل او د اوبو برخه کې یې همکاري نه ده کړې، هر څه موږ خپله کوو. موږ ته داسې درمل راځي چې کیفیت یې خراب وي او که ښه درمل راکړل شي زموږ حاصلات نور هم ښه کېږي. نتیجه یې بیخي ښه ده، ځکه د خوست له هوا سره هندواڼه برابره ده.»
یوبل ګروندګر حیات خان بیا په دې اړه وايي:« ښه پایله یې ورکړې، خو داسې ده چې تر اوسه پورې نه د زراعت کسان راغلي، نه ګرځیدلې دي، خو که موږ سره همکاري وشي، ان شاءالله ښه پایله ورکوي.»
په همدې سیمه کې یو شمېر نور کروندګر ستونزو ته د نه رسېدنې په برخه کې د اړونده ادارو په نه پاملرنه نیوکه کوي چې سږ کال یې د بېلابېلو ناروغیو او وچکالۍ له امله د هندواڼو حاصلات خراب شوي او سرپرست حکومت د دې اجازه نه ورکوي چې خپلو باغونو ته د اوبو منظم سیستم جوړ کړي.
ګروندګر عیسی خان وايي:« تور ټاپی ورته وایي، یو دا مرض کوي او بل هندواڼه چوي.»
ګروندګر صالح خان وايي:« د چرګوټي او ببرک تاڼې هندواڼه چې ده دا د نوم هندواڼه ده دلته موږ ته هېڅوک نه دي راغلي، حکومت تر اوسه زموږ هیڅ ستونزه نه ده حل کړي.»
اخوا د خوست د کرنې ریاست مسوولین مني،چې سږ کال د وچکالۍ له امله د هندواڼو کرکیله کمه شوې.
دوی زیاتوي، په مرکز او ټولو ولسوالیو کې یې د بزګرانو د ستونزو د حل لپاره د ترویج مرکزونه جوړ کړي چې له دوی سره په بېلابېلو برخو کې همکاري کوي.
د خوست کرنې او مالدارۍ ریاست متخصص او مشاور بهیر ګل صابري وايي:« سږ کال د اقلیمي بدلونونو له کبله چې اوبه کمې شوې دي او یوه عمومي ستونزه ده، نو اکثره بزګرانو د هندواڼو په کر کې کمښت راوستل، ځکه اوبه کمې دي او هندواڼه په خپل ترکیب کې ۹۰ سلنه اوبه لري نو د دې په خاطر چې هندواڼه زیاتې اوبه غواړي نو سږ کال احصایه یې د ځمکې په اندازه کمه ده.»
د خوست د کرنې، اوبو لګولو او مالدارۍ ریاست د مالوماتو له مخې، تېر کال یو هکتار کزنیزې ځمکې شاوخوا ۷ ټنه حاصلات لرل خو سږ کال د اقلیمي بدلون د تاثیراتو له امله دغه اندازه کمه شوې.
