په خوست ولایت کې د جمعې پر ورځ د (۱۴۰۳ کال د کب پر ۱۷ مه) د یوه خیریه بنسټ په همکارۍ له ۳۰۰ هغو اړمنو کورنيو سره چې سرپرستان يې معلولين دي، د خوراکي توکو مرسته وشوه.
معلولین وايي، د بد اقتصادي وضعیت له امله سختو ستونزو سره مخ دي.
د دوي په خبره، په کار ده چې له سرپرست حکومت سربېره ورسره خیریه بنسټونه هم د دا ډول مرستو کچه ډېره کړي ترڅو په دغه ولایت کې زرګونه اړ معلولین د ژوند سختۍ پرې اسانه کړي.
معلول نور وزیر وايي:« وروره! زموږ ستونزې دا دي چې په کور کې ناروغان لرم، دومره وس نه لرم چې اول د ځان او بیا د خپلې مېرمنې درملنه پرې وکړم.»
یو بل معلول بیا وايي:« ډېره خوشاله شوم، له ټولو مننه کوم. خدای ج دې وکړي چې له مظلومانو سره نورې مرستې هم وشي.»
په ورته وخت کې مسوولین بیا ډاډ ورکوي چې سرپرست حکومت او د اړونده همکارو بنسټونو په مرسته یې د معلولینو ترڅنګ بې سرپرسته کورنیو ته پر وخت مرستې رسولي او په راتلوونکې هم هڅه کوي څو د اړو معلولینو او کورنیو لاسنیوي ته جدي پام وکړي.
د خوست ولایت معلولینو چارو ریاست رییس عبدالرحیم احسان وايي:« نغدي مرستې هم شته او ترڅنګ یې د خوراکي توکو مرستې هم کړې دي. موږ ۷.۵ میلیونه افغانۍ یتیمانو او معلولینو باندې وېشلي دي.»
د خیریه بنسټ استازی وحیدالله پيغام وايي:« موږ یوازې په دې ولایتونو کې نه چې کوم مې درته یاد کړل، بلکې موږ په ټول افغانستان کې کار کوو، په بېلابېلو ولایتونو کې دا د رمضاني خوراکي توکو کڅوړه ده. توزیع یې لرو، له دې سره سره موږ هر ماښام په ۱۰ ولایتونو کې د روژه ماتي دسترخوان لرو چې په هغې کې هم توزیع لرو.»
په خوست کې له معلولینو سره دا خېریه مرسته مهال کیږي،چې لا هم په زرګونه دا ډول خلک د مناسب کاري مصروفیت نشتون او په هېواد کې د اقتصادي ستونزو له امله د نورو لاس نیوي ته اړ شوې دي.
