په خوست ولایت کې د تېر ماښام سخت توپاني باران او سېلابونو له کبله دوو تنو ژوند بایللی او شاوخوا ۶۰ کورونه زیانمن شوي دي.
ځايي مسوولین وايي، ترټولو ډېر زیان د خوست ښار اړوند دویمه ناحیه کې وېش مارکیټ ته څېرمه رامنځته شوی چې په کې د یوې ښځې او ماشوم د مړینې ترڅنګ ۲۰ کورونه هم په بشپړ ډول ویجاړ شوي دي.
خوست کې طبیعي پېښو ته د رسېدنې ادارې مشر دوست محمد هلال وايي: « بېګا شپه چې کوم توپاني باران وشو او سېلابونه راغلل، په مرکز کې یې زیات نقصان اړولی. تقریبا ً له ۵۰ تر ۶۰ کورونه په ټولیزه او قسمي بڼه زیانمن شوې او ترڅنګ یې دوه تنه شهیدان هم لرو.»
په ورته مهال، یو شمېر عیني شاهدان وایي، د یادې زیانمنې شوې کورنۍ ور ها خوا، خوست ښار کې ګڼو کاروباریانو ته هم مالي زیانونه اوښتي دي.
د دوی په خبره، د امنیتي ځواکونو ترڅنګ عامو خلکو هم د ژغورنې په برخه کې هڅې وکړې، خو سیمه کې د زیات سېلاب او سخت باران له امله د دوو کسانو له ژوند بایللو سربېره، خلک له پراخو مالي زیانونو سره مخ دي.
د خوست اوسېدونکی قادر خان وايي: « په دې کور کې مې څو ورځې وړاندې یو ګاونډی اچولی و، نن پرې سېلاب ننوتی، دېوالونه یې چپه کړي، موږ په دې اړه دویمې حوزې ته راپور ورکړی.»
د خوست بل اوسېدونکی عبدالهادي وحدت وايي: «دا داسې سېلاب و چې هېڅ ډول ځواک یې مخه نه شو نیولی، د دې ستونزې حل باید دایمي ولټول شي.»
د خوست اوسېدونکی غازي جان وايي: « ترخپلې وسې مو هڅه وکړه چې د مرګ ژوبلې مخه ونیسو.»
ځایي چارواکي که څه هم زیانمنو ته د عاجلو مرستو رسولو ډاډ ورکوي، خو ترڅنګ یې زیاتوي چې د پروني توپان له امله پر مرکز او موسی خېلو ولسوالۍ سربېره، د دې ولایت په ځینو نورو سیمو کې هم سلګونه کورنیو ته په بېلابېلو برخو کې پراخ مالي زیانونه اوښتي دي.
