د خوست امنیې قوماندانۍ مسوولین وایي، دغه ولایت کې د روان ۱۴۰۳ لمریز کال کې د بېلابېلو جنایي جرمونو په تړاو ۵۸۸ تورن کسان نیول شوې.
د دوی په خبره، د همدې کال پرمهال د خوست ولایت په مرکز او ۱۲ ولسوالیو کې ۴۲۸ جنایي پېښې هم رامنځته شوې دي.
د خوست امنیې قوماندانۍ ویاند طاهر احرار وايي: « خپلو هېوادوالو ته ډاډ ورکوو چې موږ به له هرې ممکنه لارې د خلکو د امنیت ساتلو لپاره هڅه کوو. زموږ ۴۸ کسیزه قطعه چې په ۲۴ موټرسایکلونو سمبال ده، شپه او ورځ به په ښار کې د جنايي جرمونو د مخنیوي او ښاري نظم پلي کولو لپاره کار کوي. د مجرمانو په نیولو او ښاري نظم ټینګولو کې د موټرسایکل کارول ډېر مؤثر تمامېږي؛ ځکه په هر ډول بیروبار او تنګو ځایونو کې ځان رسولی شي. امنیتي ځواکونه هم له دې وسیلې خوښ دي او خلک هم رضایت لري.»
ورته مهال ځایي اوسیدونکي له امنیتي چارواکو غواړي چې په دې ولایت کې د امنیتي او جنایي جرمونو د مخنیوي په تړاو خپل اقدامات لا چټک کړي.
دوی زیاتوي، د نورو غیر قانوني کړنو ترڅنګ باید امنیتي مسوولین په دې ولایت کې د نشه یي توکو د قاچاق او خرڅلاو د مخنیوي لپاره هم کوټلې ګامونه پورته کړي.
د خوست اوسیدونکی حاجي قدیم وايي: « له اسلامي امارت مننه کوم چې دا ډول یوه قطعه یې جوړه کړې. دا قطعه د جنايي جرمونو د کمېدلو لپاره یو ښه اقدام دی. دا کسان کولی شي په چټکۍ سره ځان د پېښې ځای ته ورسوي. که دا قطعه په ولسوالیو کې جوړه شي، نور به هم ښه شي.»
د خوست امنیې قوماندانۍ مطبوعاتي دفتر د شمېرو له مخې، روان کال کې په دې ولایت کې د ۳۲۸ ټرافیکي پېښو ترڅنګ ۴۳ د اور لګېدنې پېښې هم رامنځته شوي چې په کې لسګونه کسانو ته مرګ ژوبله اوښتې.
