شنې ساحې، ځنګلونه او د غرونو لمنې، طبیعي منظرې او ښکلې هوا د هغو کسانو لومړنی انتخاب وي چې غواړي د ښار له شوره پناه یوسي.
د خوست ولایت تڼیو ولسوالۍ اړوند د اد مامد سیمې ته هر کال د دې ولایت له اوسېدونکو سربېره د هېواد له بېلابېلو ولایتونو زرګونه سلانیان ورځي.
خو د طبیعت په دې آرامه غېږ کې د ځنګل وهنې وروستیو پېښو د خلکو اندېښنې راپارولي دي او وايي، ځنګل وهنه د سیمې ښکلا ته جدي ګواښ دی.
د خوست اوسېدونکی ډاکټر رحیم ګل ساجد وايي: « ځنګلونه د طبیعي پېښو او په ځانګړې توګه د غره ښویېدلو په مخنیوي کې ځانګړی رول لري. دولت ته په کار ده چې د ځنګلونو وهلو مخه ونیسي.»
د خوست یو بل اوسېدونکی ذبیح الله تڼی وايي: « له مسوولو کسانو او چارواکو غواړي چې په دې برخه کې جدي ګامونه پورته کړي، خلکو ته عامه پوهاوی ورکړي، ترڅو دا شتمني له منځه لاړه نه شي.»
که څه هم د سرپرست حکومت له راتګ وروسته تر ډېره د ځنګل وهنې مخنیوی شوی، خو بیا هم د خوست په یو شمېر سیمو کې دا چاره دوام لري.
خلک د دې کار لامل په غرنیو سیمو کې د اوسېدونکو اقتصادي ستونزې بولي.
ځایي اوسېدونکي او سیلانیان وايي، که دا چاره دوام ومومي ښايي د دې ولایت شته ځنګلونه د وخت په تېرېدو سره له منځه لاړ شي.
د خوست اوسېدونکی محمد جلیل همت وايي: « پر دولتي ارګانونو غږ کوو چې د دې کار مخه ونیسي. همدارنګه د تڼیو له قومي شورا هم غواړو چې د یوه ولسي تړون له مخې د ونو پرېکول بند کړي.»
د تڼیو ولسوالۍ اوسېدونکي خان ولي وايي: « په دې برخه کې باید د دولت له خوا توجه وشي، اړتیا ده چې د سیمې خلکو ته هم عامه پوهاوی ورکړل شي، ترڅو د ځنګلونو د پرې کولو مخه ونیول شي.»
د خوست اوسېدونکی نور الرحمن نوراني وايي: « له دولت غوښتنه کوو چې د سیمې د اوسېدونکو اقتصادي ستونزې هوارې کړي، ترڅو د ځنګلونو له وهلو لاس واخلي.»
له بلې خوا، ځایي چارواکي په دې ولایت کې د ځنګل وهنې وروستیو پېښو ته په غبرګون کې وایي، د ورته کړنو په تړاو به جدي ګامونه واخلي.
د دوی په خبره، په یاده برخه کې تر اوسه د ځنګل وهنې شاوخوا ۸۵ سلنه مخنیوی شوی.
د خوست امنیه قوماندان عبدالله حماد وايي: « موږ خپلو امنیتي ځواکونو ته امر کړی چې د ځنګل وهنې عاملین ونیسي او محکمې ته یې حواله کړي. موږ د دې ډول پېښو مخنیوي ته متوجه یو او کوښښ کوو چې بیا ځل تکرار نه شي.»
د خوست تڼیو ولسوالۍ اړوند اد مامد سیمه چې د هېواد په ملي پارکونو کې هم راځي، د ځنګل وهنې وروستي خواشینوونکي تالان پر خواله رسنیو هم د خلکو پراخ غبرګونونه راپورته کړي دي.
د دې ولایت د اوسېدونکو په خبره، اړونده ادارې دې د ځنګل وهنې د مخنیوي په برخه کې د چټکو اقداماتو ترڅنګ، د ځنګلونو بیا احیا ته هم جدي پام وکړي.
