په خوست ولایت کې د مرغانو یو شمېر کاروباریان وايي، خراب اقتصادي وضعیت د دوی پر کاروبار منفي اغېز کړی دی او د پخوا پرتله يې د مرغانو پلور کمرنګه شوی دی.
سلام خان چې د خوست ولایت مرکز اوسېدونکی دی، نږدې ۲۳ کاله کیږي چې د مرغانو د خرڅلاو له لارې د کور اړتیاوې پوره کوي، خو د نوموړي په خبره په وروستیو کې د خلکو خراب اقتصادي وضعیت د دې لامل شوی، چې کاروبار يې اغېزمن شي.
سلام خان زیاتوي:« له موږ سره د مرغیو بېلابېل ډولونه دي. ډولونه یې بیخي زیات دي. موږ له ۲۰ تر ۲۵ ډوله مرغۍ لرو. مخکې له خلکو سره پيسې ډېرې وې خو اوس د خلکو اقتصادي وضعیت خراب شوی دی او بازار مو ګمرنګه دی.»
په افغانستان کې له څو لسیزو جګړو څخه د ستومانه شویو ځینو افغانانو له پاره به له مرغانو سره وخت تېرول د خوښۍ یوه شیبه وي. خو د سلام خان په خبره، د خلکو دا شوق د جیب پر وزن پورې تړلی او د پخوا په پرتله ډېر کم رنګه شوی دی.
په ورته مهال په خوست کې د مرغانو یو شمېر نور کاروباریان هم د خلکو پر اقتصادي ستونزو سربېره د سرپرست حکومت لخوا د ښکار بندیز هم د دې لامل ګڼي، چې د پخوا په پرتله یې ګټه وټه کمه شي.
د مرغانو پلورونکی رحمن الله وايي:« خلک بې وزله دي، چې ښکار ونه کړي نور کاروبار هم نه شته دی باید ښار بند نه شي او پرې لګول شوی بندیز لرې شي.»
اخوا ځایي چارواکي وایي، د زینتي مرغانو د نسلونو ورکیدو له وېرې د مشرتابه له هدایاتو سره سم دوی پر ښکار بندیز لګولی ترڅو په اوږد مهال کې دا کاروبار په بشپړه توګه زیانمن نه شي.
په خوست کې د مرغانو د خرڅلاو دا یوازینی مارکیټ چې شااوخوا ۲۵ دوکانونه په کې موجود دي، په کې لسګونه خلکو ته د کار زمینه هم برابره ده.
دوی داسې مهال د کاروبار د ښه والي او ښکار د خلاصون غوښتنه کوي، چې د سرپرست حکومت مشرتابه په ټول هېواد کې د یو فرمان پر بنسټ، د مرغانو پر ښکار بشپړ بندیز لګولی دی.
