د خوست ولایت اور وژنې ادارې یا اطفایې مدیریت مسوولین وايي، تېر ۱۴۰۳ لمريز کال په دې ولايت کې د اور لګيدنې ۴۳ پېښې رامنځته شوې دي.
دوی زیاتوي، که څه هم د یادو پېښو د کنټرول پرمهال یې د کابو ۵۰۰ ميليونو افغانیو مالي زيان مخه نيولې، خو د دې پېښو په لړ کې۱۰ کسانو خپل ژوند له لاسه ورکړی.
د خوست اطفایې مدیر حیات خان دلدار وايي: « په تېر ۱۴۰۳ کال کې د ټول خوست پر کچه ۴۳ طبیعي او غیر طبیعي پېښې رامنځته شوې دي چې له امله یې ۹۴ میلیونه افغانۍ مالي زیان اوښتی او ۱۰ تنو هم په کې خپل ژوند له لاسه ورکړی.»
مسوولین د خوست ولایت نفوس او ګڼې ګوڼې ته په کتو د اور وژنې اوسني محدود امکانات کافي نه بولي.
دوی زیاتوي، که څه هم په وروستیو کې د باک او نادرشاه کوټ ولسوالیو لپاره د اطفایې تشکیلات منظور شوي، خو لاهم ګڼې سیمې د اطفایې د وسایطو، تجهیزاتو او روزل شویو کارکوونکو له کمښت سره مخ دي.
د خوست اطفایې مدیریت مرستیال ذبیدالله زغم وايي: « تاسو ته بهتره ماالومه ده چې خوست کې ډېرې لوړ پوړیزې ودانۍ شته. کله چې په دغو ودانیو کې اورلګېدنه رامنځته کېږي، موږ اطفایوي لفټ یا کرېن ته اشد ضرورت پيدا کوو. باید دغه وسیله زموږ لپاره خریداري شي، ترڅو موږ دغه شان پېښو ته په وخت رسېدنه وکړو.»
اخوا ځایي اوسېدونکي هم د اور لګېدنې پېښو له زیاتېدو سره هممهاله اندېښنه لري، که خلک احتیاطي تدابیر ونه نیسي، د انساني او مالي زیانونو کچه به نوره هم لوړه شي.
دوی د دې ترڅنګ له مرکزي حکومته غواړي چې د دې ولایت لپاره د اورلګېدنې د مخنیوي په موخه امکانات ډېر کړي.
د خوست اوسېدونکی سید ولي شاه وايي:« هر دوکاندار باید د اور وژنې ډبه ولري، ترڅو اور پرې مړ کړي. د دوکانونو مخې ته باید څوک موټر ونه دروي؛ ځکه لارې تنګې دي او د اور لګېدلو پرمهال اطفایه نه شي کولی ځان ورسوي.»
د خوست یوبل اوسېدونکی حاجي محمد علي وايي: « له دوو یا درېېو دوکانونو باید یو یې د اور وژنې ډبه ولري، ترڅو اور کنټرول کړي. باید د برېښنا په ګډون له اور اچوونکو او وسایلو سره احتیاط وشي.»
په خوست کې د تېر ۱۴۰۳ لمریز کال پرمهال د اور لګېدو پېښې او اندېښنې داسې مهال دي چې وړم کال د دې ولایت پرکچه یوازې ۱۸ ورته پېښې رامنځته شوې وې، خو مسوولین ټینګار کوي چې د خلکو همکاري، احتیاط او د غوره امکاناتو شته والی کولی شي پر وخت د دې ډول پېښو مخه ونیسي.
