د خوست ښار په دویمه او درېیمه ناحیه کې د سړک رغونې پر یوه پروژه نږدې ۳۰ میلیونه افغانۍ لګښت راځي او چارې به یې د پنځو میاشتو موده کې بشپړې شي.
مسوولین وایي، دوی په دې هڅه کې دي چې د هټۍ والو او ښاريانو ستونزو د حل لپاره ګڼې بېلابېلې پروژې پلې کړي.
خوست ښاروال حافظ عبدالرشید عمري وايي: « موږ پوره هلې ځلې کوو، ترڅو خوست ښار ته کار وکړو. په داسې نورو پلانونو هم کار روان دی چې د ښاري نظم لپاره اړین دي.»
په همدې حال کې د ځايي هټۍ وال او ښاریان هم د يادې رغنيزې پروژې پر پيل خوښ دي او وايي، له دې سره به له ښاري نظم سربېره د ښار د پاکوالي په برخو کې هم مثبت بدلون راشي.
هټۍ وال عبدالله منګل وايي: « د دې سړک له خاورو او دوړو خلک ډېر په تکلیف وو، حتا مجبور شوو چې د خپلو هټیو دروازې وتړو. اوس چې دا سړک جوړېږي، موږ او پېرودونکو ته به ډېر سهولتونه رامنځته شي.»
هټۍ وال شاهد الله افغان وايي: « د خوست ښار پاتې کوڅو او واټونو ته به هم باید ډېره پاملرنه وشي. دلته اوس د ټولو ولایتونو خلک اوسېږي او لوی ښار دی.»
د ښاروالۍ د مسوولينو د معلوماتو له مخې، د روان ۱۴۰۴ کال تر پايه ښايي د ۲۵۰ ميليونه افغانيو په لګښت۳۰ رغنيزې پروژې پلې شي او دغه راز راتلونکی کال هم د خوست ښار د لا پراختیا لپاره ۴۰ لويې او وړې پروژې په پلان کې نيول شوې دي.
