د خوست سپېرې ولسوالۍ سیمهییز مسوولین او اوسېدونکي وایي، د چهارشنبې په شپه شاوخوا دولس نیمې بجې د دې ولسوالۍ اړوند مڼې کلي کې د یوه عام وګړي پر کور د پاکستان پوځي رژیم جېټ الوتکو هوايي برید کړی چې له امله یې ۱۹ تنو ته مرګ ژوبله اوښتې.
د سیمې اوسېدونکو په خبره، په دې برید کې د ښځو او ماشومانو په ګډون نهه کسان شهیدان او لس نور ټپیان شوي دي.
د سپېرې ولسوالۍ امنیه قومندان اسلام نور جهاد وايي: « په دې برید کې د ملکي وګړو دوه کورونه په نښه شوي او په بشپړه توګه له منځه تللي. په دې برید کې ۹ تنه شهیدان او ۱۰ نور ژوبل شوي دي.»
قومي مشر علي خان وايي: « که نړیوال قوانین داسې وي چې بېله ثبوت پر بې ګناه خلکو بریدونه کېږي، خیر دی موږ د هم بمبار شو؛ مګر که داسې نه وي، د یوه بېګناه شپون په کور دومره بې رحمانه برید باید پوښتنه وشي. د برید له ویجاړي ښکاري چې په دې برید کې شدید چاودېدونکي توکي کارول شوي.»
ځایي اوسېدونکي د بې ګناه افغانانو پر کورونو او عامو خلکو بریدونه د اندېښنې وړ بولي او د بشري حقونو له نړیوالو مدافع بنسټونو غواړي چې د ملکي وګړو د خوندیتوب لپاره خپل مسوولیت اداء کړي او د ورته پېښو مخه ونیسي.
د دوی په خبره، نړیوال قدرتونه دې نور په افغانانو د پاکستان پوځي رژیم د دې وحشیانه بريدونو د مخنیوي لپاره عملي ګامونه پورته کړي.
د پوځي رژیم بریدونو کې زیانمن شوی حسن خان وايي: « نیمه شپه د سراج الدین په نوم کس په کور د پاکستان پوځي رژیم له خوا وحشیانه برید شوی او هرڅه یې تباه کړي.»
د سپېرې ولسوالۍ اوسېدونکی شربت خان وايي: « ما ته دا پوښتنه پیدا کېږي چې نړیوال بشري حقونه څه شي ته وايي، ایا دلته د پاکستان له خوا په بمونو وژل کېدونکي کسان بشر نه دی؟ ولې نړۍ د پاکستان پر قتل عام چوپه خوله ده؟»
د سیمې یوبل اوسېدونکی علي جان وايي: « نړۍ او ملګري ملتونه تش د بشري حقونو چغې وهي، دوی هېڅکله د پاکستان له خوا پر ملکي افغانانو د وحشیانه بریدونو پوښتنه ونه کړه.»
دا په داسې حال کې ده چې د خوست په سپېرې والسوالۍ کې د پاکستان پوځي رژيم له برید سربېره، د پکتیکا په برمل ولسوالۍ کې هم پر یوه کور د هوایي برید له امله درې ماشومان شهیدان شوي.
